“Rusia ka qenë një kontribtore shumë e rëndësishme në progresin që bota ka bërë në Siri”,- është shprehur këtë të martë Sekretari i Shtetit John Kerry, nga Moska.
Zyrtarët amerikanë shpesh kanë kritikuar ndërhyrjet e Rusisë në Siri, duke e quajtur Rusinë si ‘kundërproduktive’ në luftën kundër ISIS dhe më shumë bashkëpunëtore për forcimin e regjimit të Presidentit Bashar Assad. Tonet e SHBA-së ndryshuan pas takimit të Barack Obamës me Vladimir Putin në muajin nëntor, ku dy liderët botërorë pranuan të bashkëpunonin në mënyrë diplomatike për t’i dhënë fund luftës së përgjakur civile në Siri.
Kerry falënderoi homologun e tij në Rusi, Sergey Lavrov, duke thënë: “Ne jemi tërësisht dakort me axhendën që ju keni përcaktuar”.
“Çfarë është e rëndësishme për të theksuar, qëndron në faktin se ka pasur shumë diferenca mes nesh, por pavarësisht kësaj, kemi mundur të bashkëpunojmë shumë mirë për çështje të caktuara dhe Rusia ka dhënë një kontribut të rëndësishëm në dialogun me Iranin për çështjen nukleare. Në diskutimet në Vienë, Rusia ka qenë një kontributor shumë i rëndësishëm për progresin që kemi realizuar”,- tha Kerry, referuar bisedimeve në lidhje me Sirinë, të bëra së fundmi në Austri./tesheshi.com/
