Incidenti i djeshëm në Shkup, ku humbi jetën njëri ndër 56 të aboluarit e presidentit të shtetit, pronari i ueb portalit “Netpress”, Kosta Kërpaç ka ngritur dyshime të mëdha se ai është vrarë nga persona të paidentifikuar. Jozyrtarisht mësohet se nuk bëhet fjalë për vetëvrasje, pasi të gjitha plumbat që janë shkrepur janë në gjoksin e tij.
Lajmi për vdekjen e tij e ka goditur rëndë edhe Prokurorinë Speciale në Maqedoni. Sipas tyre Kërpaç ka qenë një njeri i jashtëzakonshëm i cili kohës fundit ka vuajtur nga presioni i pushtetarëve meqë është paraqitur në zyrat e Prokurorisë Speciale në cilësinë e dëshmitarit në kuadër të një procedure para hetimore lidhur me skandalet e funksionarëve politik të pushtetit.
“Bashkëpunimi me dëshmitarin ishte korrekt dhe bëhej fjalë për një person të jashtëzakonshëm, kështu që lajmi për vdekjen e tij i ka goditur të gjithë të punësuarit në këtë prokurori. Ju njoftojmë se prokuroria posedon fakte për shumë rrethana relevante përfshirë edhe për presionin në të cilën është gjetur personi Kosta Kërpaç, por duke pasur parasysh se bëhet fjalë për informacione konfedenciale, të njëjtit nuk do të ndahen me opinionin në këtë moment”, kanë njoftuar nga Prokuroria Speciale.
Ata kanë hedhur poshtë çdo pretendim se më parë kishin ngritur ndonjë procedurë penale ndaj Kërpaq, dhe është e pakuptimtë si mund të ndodh që presidenti i shtetit të falë dikënd që nuk akuzohet për asnjë vepër penale.
“Në këtë rast dëshirojmë të tregojmë se para kësaj Prokurorie ndaj të ndjerit nuk është iniciuar procedurë penale dhe se i njëjti nuk ka pasur cilësinë e personit të dyshuar”. Nga këto arsye për ne është e panjohur vendimi i presidentit Ivanov për ta falur këtë person, dhe ne presim përgjigje prej nga i ka informacionet presidenti se ne, kushtimisht ndaj këtij personit kemi iniciuar procedurë penale”, thuhet më tej në njoftimin e PSP-së. /tesheshi.com/
