Dana Rohrabacher është një kongresmen i SHBA nga Kalifornia. Është një politikan tipik konservator me një karrierë shumë të gjatë politike kryesisht në komisionet e jashtme dhe të sigurisë së Dhomës së Përfaqësuesve.
Ka çuditur shumë letra e tij dërguar Presidentit serb, Tomislav Nikoliç për shkëmbimin e territoreve të Preshevës me veriun e Kosovës.
Por kjo temë e prekur nga një politikan përbën jo vetëm tabu por realisht kthen situatën në një rihapje të kufijve në Ballkan. Fiks siç e kërkon Putin që ka bërë thirrje për një Jaltë të re.
Në fakt këtë e propozoi edhe Rexhep Qosja së bashku me një ish-zyrtar i lartë të CIA-s, por këto janë terma që kërkojnë një zhvillim më të gjatë kohor dhe nuk mund të zhvillohen fët e fët. Se për shembull, nëse hapet loja, bullgarët kërkojnë Maqedoninë dhe shqiptarët Çamërinë e më gjerë.
Por Dana Rohrabacher, një deputet i cili ka lidhje të forta me pjesën konservatore të republikanëve dhe njihet si një nga përkrahësit më të fortë të Donald Trump-it, është njëherësh edhe një kongresmen me lidhje të forta me Beogradin. Ai ka qenë në Serbi shumë herë dhe ka shumë votues serbo-amerikanë që e mbështesin.
E mbani mend Milan Paniçin, miliarderin serbo-amerikan dhe manjatin farmaceutik, të cilin Milosheviçi e bëri kryeministër të Jugosllavisë e më pas i doli kundër? Ai është nga Kalifornia dhe njihet si mik me Dana Rohrabacher.
Ky i fundit dy vjet më parë i kërkoi FBI-së që të hetojë Edi Ramën, pas fotos së kryeministrit shqiptar kur ishte kreu i opozitës, me Barack Obamën, në San Françisko në vitin 2012.
Rohrabacher ishte kongresmeni që akuzën e PD-së e bëri kërkesë zyrtare. Dhe më pas nisi hetimi. Në fund, Edi Rama nuk doli kërkund, vetëm se personi që akuzohet nga PD se ka dhënë para për Obaman në fushatë, u dënua si pasojë e ligjit amerikan që një i huaj nuk lejohet të japë para në SHBA.
Por askund, deri tani të paktën, nuk është përmendur Rama.
Gjithsesi, e gjitha kjo panoramë ka një gjurulldi faktesh; por më shumë shton rrezikun se letra formale e kongresmenit republikan mund t’u japë një dorë nacionalistëve serbë për të akuzuar shqiptarët se duan të rihapin çështjen e kufijve në Ballkan.
Thënë qartë, këtë çështje i pari e hapi Milorad Dodik, presidenti i Republika Srbska, i cili ka lidhje të forta lobimi me njerëz të lidhur me republikanët. Një ndër to është edhe Milan Paniç, multimiliarderi serb i cili financon repulikanët, e ndër to edhe Dana Rohrabacher.
Doni një fakt?
Paniç e ka selinë në qytetin Newport të Kalifornisë, aty ku ndodhet edhe zyra e kongresmenit republikan. Të dy kanë përfunduar të njëjtin universitet, South Californa, thuajse në të njëjtën gjeneratë.
Në këtë qytet ka fare pak shqiptarë. Serbët ndodhen si pjesë e perandorisë farmaceutike të Paniçit. Ndaj asgjë nuk ka lidhje as me shqiptarët e as me Kosovën. Është një lojë që më shumë iu duhet serbëve, sidomos për zgjedhjet presidenciale. /tesheshi.com/
