Selia blu u gdhi sot me një banderolë ku shkruhej “Basha Ik!”.
Demokratët e zhgënjyer nga rezultati, demokratët që u lanë jashtë listave për deputetë, ata që mbetën jashtë vëmendjes së çadrës, e të pakënaqurit e marrëveshjes Basha-Rama, sot u ka ardhur koha të flasin.
Në Partinë Demokratike po organizohet grupi i të pakënaqurve me rezultatin për të hartuar një kërkesë për dorëheqjen e tij nga kreu i partisë.
Burime pranë kësaj selie bënë me dije për tesheshi.com se kërkesa që do të bëhet publike sot ose nesër mban deri më tani firmat e 25 deputetëve, themeluesve dhe zyrtarëve të lartë të kësaj partie.
Ata janë në pritje të një dorëheqje të Bashës pas humbjes, por kreu i PD-së nuk ka bërë asnjë koment për mediat deri më tani. 48 orë pas zgjedhjeve, ku rezultati është pothuajse përfundimtar: një shkatërrim elektoral për partinë që lindi si nevojë e ndryshimeve demokratike në ’90.
Dorëheqja e tij do të hapte rrugën analizës së humbjes dhe zgjedhjeve të reja në parti.
Mobilizimi i kundërshtarëve ka nisur ndërkohë. Burimet bënë të ditur se këtë listë e kryeson Astrit Patozi, Jozefina Topalli, Majlinda Bregu, Arben Imami e të tjerë ish-deputetë të grupit parlamentar që Basha i fshiu nga lista me një të rënë të lapsit. Këtyre emrave u janë bashkuar dhe ata që njihen si “njerëzit e Olldashit”, deputeti i ndjerë i PD-së i cili garoi kundër Bashës për kryetar partie dhe tregoi se kishte një mbështetje shumë të madhe në anëtarësinë e demokratëve.
Ata që votuan Olldashin janë akoma në PD dhe ky është rasti i hakmarrjes për liderin e tyre që nuk e mori kryesimin e partisë. pasi kandidati përballë kishte bekimin e Berishës.
Kundërshtarët kanë në favor të tyre dhe heshtjen e Berishës, liderit historik të PD-së, i cili nuk ka thënë asnjë fjalë për humbjen; por që para zgjedhjeve ia faturoi pasardhësit të tij çdo rezultat të mundshëm duke u shprehur se “lista e kandidatëve është e Bashës”.
Në qarqet demokrate flitet madje dhe për një revoltë të tipit: Duam Babën!
Të zhgënjyerit besojnë se vetëm Sali Berisha mund t’a udhëheqë këtë parti; e meqë hija e tij vijon të rëndojë mbi selinë blu ata do të kërkojnë rikthimin e Berishës në krye të partisë.
Por kjo do të jetë një revoltë për të thyer Bashën se sa një aksion i vërtetë politik, pasi nuk besohet se Berisha të rimarrë frenat e partisë më në dorë. Gjithsesi qëndrimi i tij në situatën ku ndodhet partia është padyshim i rëndësishëm dhe do të inkurajojë ose dekurajojë sulmuesit e Bashës.
Kundërshtarët publikë
Fortuna ndaj Bashës sapo ka nisur; ajo pritet të marrë përpara ortekun e zemëratës demokrate në ditët në vijim.
Ish-deputeti Besnik Mustafaj ishte i pari që doli me kërkesën për dorëheqje të Bashës. Atë e pasuan dhe shumë emra të tjerë si Ilir Rusmaili, Dash Sula, etj.
Por ata që kryesojë zemërimin demokrat nuk kanë folur akoma. Topalli e Imami e kërkuan shkarkimin e Bashës 3 javë para zgjedhjev; e tani është momenti që t’a bëjnë institucionale këtë gjë.
Ish-deputetët Astrit Patozi, Eduart Selami e Majlinda Bregu janë po ashtu zëra me peshë në këtë fortunë anti-Basha.
Të gjithë këta kanë punuar për këtë humbje të sotshme.
Bojkoti, opozitat ose vota e protestës
PS-ja dhe LSI-ja kanë konfirmuar votat e mëparshme, madje kanë shënuar rritje të elektoratit të tyre, po votat e PD-së ku shkuan?!
Ka shumë që flasin për një bojkot ndaj opozitës. Votues të saj që nuk kanë shkuar të votojnë ose kanë shkuar por kanë votuar një parti tjetër ose e kanë nxjerrë votën të pavlefshme.
Këto janë deklaratat që demokratët bëjnë sot pas zgjedhjeve për votën e tyre. Duket sikur ata i kanë parë këtë zgjedhje, jo si një shans për fitore të partisë së tyre, por me syzet e hatërmbetjes me Bashën, me çadrën, me marrëveshjen e 18 majit dhe emrat e rinj të listës Basha.
Ky është përfundimi që del nga humbja e PD-së në zona ku ka qenë gjithmonë e fortë apo me apatinë e fushatës elektorale të demorkatëve.
Tani gjithçka mund të ndodhë në PD. Një dorëheqje e pakthyeshme e Bashës, një dorëheqje dhe rikandidim në zgjedhjet e ardhshme në parti, lindja e liderëve të rinj brenda selisë blu. Por ajo që pritet më me interes në këtë monent dhe që vendos fatin e kryesimit të PD-së është qëndrimi që do të mbajë Berisha për humbjen dhe kë grup do të mbështesë ai sot. /tesheshi.com/
