Prokuroria e Përgjithshmë ka paraqitur konkluzionët përfundimtare të dosjes së korrupsionit në Gjykatën e Lartë, ku është e përfshirë ish-gjyqtarja Majlinda Andrea dhe bashkëshorti i saj Odhise Andrea. Organi akuzës kërkoi shpalljen fajtor të të akuzuarve dhe dënimin e tyre përkatësisht me 4 vite burg për gjyqtaren dhe 5 vite për bashkëshortin e saj. Prokuroria kërkoi edhe sekuestrimin e shumës prej 50 mijë euro të përfituara nga korrupsioni.
Krahas dënimit u kërkua dhe përjashtimi i saj 5 vjet nga e drejta për të kryer funksione publike.
Ndërkohë për bashkëshortin e saj Odhise Andrea u kërkua dënimi me 5 vite burg dhe 5 vite mosushtrim të funksioneve publike.
Sekseri i tyre i akuzuar për të njëjtën vepër penale Petraq Dashi rrezikon gjithashtu 4 vite burg. Prokuroria kërkoi edhe 2 vite burg për Ilia Çabirin dhe 1 vit për Eleni Linon, të përfshirë në këtë krim.
Nga hetimet rezulton se, për të përfituar një verdikt të favorshëm për një çështje pronësie i janë paguar bashkëshortit të gjyqtares 50 mijë euro. Hetimi është zhvilluar së pari nga Krimet e Rënda dhe më pas është shpallur moskompetenca, pasi gjatë përgjimeve doli edhe emri i gjyqtares së lartë./tesheshi.com
