Zyrtarë të Ambasadës Gjermane në Prishtinë kanë deklaruar se nuk kanë vërejtur rritje të kërkesave për azil nga shtetasit e Kosovës.
Sipas tyre, këta të fundit nuk kanë gjasa për azil, pasi 99 % e kërkesave refuzohen si të pabaza
Kështu kanë deklaruar për gazetën “Zëri” zyrtarë të Ambasadës, pas raportimeve të medieve se qytetarë të shumtë po udhëtojnë nga Stacioni i Autobusëve në Prishtinë për në Beograd për t’ia mësyrë më pas ilegalisht kufirit me Hungarinë.
“Në Gjermani kërkesat për azil nga nënshtetasit e Kosovës faktikisht nuk kanë gjasa për pranim dhe rreth 99 për qind e tyre refuzohen si ‘dukshëm të pabaza’.
Përjashtim përbëjnë vetëm raste të rralla, të cilat njihen jo në kuadër të azilkërkimit, por si mbrojtje subsidiare dhe janë raste të ndihmës emergjente humanitare (2010-2017 gjithsej vetëm 56 persona)”, thuhet në përgjigjen e Ambasadës Gjermane, duke shtuar se Kosova konsiderohet si vend i sigurt i origjinës. /tesheshi.com/
