Kryeministri Edi Rama ka kërkuar gjatë ditëve të fundit dorëheqjet e drejtuesve të Zyrave të Regjistrimit të Pasurive të Paluajtshme, si dhe të drejtuesve të spitaleve rajonale, referuar edhe ankesave të shumta të qytetarëve në lidhje me shërbimet e ofruara.
Por duket se kërkesa e Kryeministrit Edi Rama drejtuar të emëruarve në zyrat e hipotekave dhe qendrave spitalore nuk është marrë parasysh.
Tesheshi.com ka mësuar se nga drejtuesit e zyrave hipotekore vetëm 6 prej tyre kanë paraqitur dorëheqjet, ndërsa nga drejtuesit e spitaleve rajonale, vetëm ai i Spitalit të Durrësit, Alban Ramohito ka dhënë dorëheqjen. Në vend të tij është komanduar Viola Çikalleshi.
Referuar shifrave të dorëheqjeve të drejtuesve të zyrave hipotekore dhe spitaleve rajonale, duket se të emëruarit në këto poste po sfidojnë Kryeministrin, duke mos pranuar dhënien e dorëheqjeve, të paktën deri në 1 Gusht.
Tesheshi.com ka mësuar se pas urdhërit të Kryeministrit kanë paraqitur dorëheqjet drejtuesit e zyrave të regjistrimit të pasurive të paluajtshme në Fier, Elbasan, Gjirokastër, ndërkohë që edhe drejtuesi i Beratit dhe ai i Shkodrës pritet të ndërmarrin një veprim të tillë.
Blerina Doracaj, e sapoemëruar si drejtuesja e Hipotekës, një ditë më parë, ka shpjeguar se për ecurinë e punës dhe situatën e çdo zyre vendore është hartuar një informacion i cili i është paraqitur kryeministrit, pa i fshehur asgjë.
“Mbi bazën e kësaj analize fillestare të situatës kam kërkuar që të gjithë drejtuesit e zyrave vendore të futen në garë për të merituar nderin për t’u shërbyer qytetarëve. Regjistruesit do të përzgjidhen përmes një procedure të hapur, e cila do të përmbyllet në fund të muajit gusht”, u shpreh ajo.
Në lidhje me punonjësit e Zyrave të Regjistrimit, verifikimi i figurës dhe punës së tyre, një lloj vettingu ashtu si në sistemin gjyqësor, do të nisë së shpejti.
“Do të nisë dhe një proces verifikimi, apo siç mund ta quajmë process vettingu për të gjithë punonjësit e zyrave të regjistrimit, nga i pari tek i fundit. Për çdo rast që konstatohet shkelje e ligjit do të procedohet me kallëzim penal dhe për çdo rast shkeljesh të renda administrative do të behët largimi nga puna i këtyre punonjësve”, tha Doracaj. /tesheshi.com/
