Pas “dorëzimit” në paqe të 30 qershorit, e kjo prej një diktati amerikan, opozita duket se po e zhvendos betejën në të tjera fronte, gjithnjë me synimin për ta zhbërë tashmë atë që ndodhi: votimin më 30 qershor, prej së cilit dolën 60 kryebashkiakë të PS-së, pikërisht nga bojkoti i PD-LSI.
Dhe kjo ka bërë që të rimerret kauza e “hapjes së kutive”, e cila i takon PS-së së dikurshme në opozitë, e lindur pas zgjedhjeve të 2010, e që u finalizua dhe me një grevë urie prej saj.
Eshtë Klemend Zguri, kryetar i KQZ-së nga opozita, i cili ka kërkuar pikërisht hapjen dhe rinumërimin e të gjitha kutive, pas pretendimit se ky institucion ka dhënë shifra të paradorduara lidhur me pjesëmarrjen. Kjo e fundit është dhe arma më e fundit e opozitës për ta deligjitimuar 30 qershorin.
“Kërkova që KQZ të kishte hetim administrativ kryesisht. Për të mbështetur propozimin tim, do të nisem nga disa fakte që janë bërë publike dhe kanë krijuar problemin në fjalë.
Kemi deklaratën e orës 11:00 të KQZ ku thuhet pjesëmarrja në votime 12%
Ndërkohë këtu kam tabelat në faqen e KQZ, ora 11:00 kur deklarata thoshte 12%, në tabelën është 6.19 %, gati gjysmë për gjysmë
Kur unë këtu jam i paqartë mendo sa i paqartë është publike. I kemi detyrim qytetarëve për transparencë në procesin zgjedhor
Në deklaratën para mediave të dielën, deklarova që KQZ do duhet të ndërmerrte një hetim administrativ kryesisht duke i bërë thirrje kolegëve të mi. Kjo që po kërkoj ndihmon kryesisht në rritjen e transparencën dhe në risjelljen e besimit të publikut në procesin zgjedhor. Propozimin e kam në tavolinë”, tha kryetari Zguri.
Por zëvëndësi i tij, Denar Biba, tha se kjo ishte një kërkesë tërësisht e paarsyeshme, pa mbështetje ligjore, e për më tepër e diktuar politikisht nga opozita.
Sipas tij, të ketë me patjetër hetim administrativ në lidhje me shifrat e publikuara e që pretendohen të kenë patur mospërputhje, por jo të hapen kutitë.
“Këto zgjedhje nuk do mbarojnë kurrë nëse hapen të gjitha kutitë”, tha Biba, duke shtuar : “unë jam dakord të hetohet që nga ai tek dera por jo të hapen të gjitha kutitë”.
Nga ana tjetër, anëtarja e KQZ-së Edlira Jorgaqi i kërkoi Zguri që të japë argumentet ligjorë të kërkesës së tij.
“Kërkoj bazë ligjore se ky mbështetesh sepse të flasim në ajër mund të bllokojmë procesin. Hetimin duhet ta kanalizoni qartësisht: na jepni bazën ligjore me shkrim, shkeljen që është bërë me dispozitën e kodit, dhe jam dakord…”, tha ajo.
Kërkesa e Zgurit për hapje kutish erdhi pak pasi Sekretari i Përgjithshëmi PD-së, Gazmend Bardhi, paditi KQZ-në për krim zgjedhor, pikërisht duke iu referuar shifrave të pjesëmarrjes, me pretendimin se janë manipuluar.
“Ti nuk e doje këtë proces dhe në fund fare çfarë do të bësh, do ta sabotosh? Nuk ta gjykoj dot, nenet t’i gjen Gaz Bardhi ty. Ti në fillim këtë doje, këtë që dua edhe unë, por të erdhi një mesazh edhe ndryshove qëndrim”, ishin fjalët e Bibës ndaj Zgurit, në një përplasje verbale mes tyre në mbledhjen e KQZ.
Kujtojmë se PD kurrë nuk i hapi kutitë, një pjesë të vogël të tyre, siç PS ja kërkonte dikur. Por pak më vonë, në zgjedhjet lokale të 2011-ës, KQZ e drejtuar nga Arben Ristani do hapte kutitë e kërkuara nga PD, gjë që më pas, edhe pse pa rakodrim shifrash, Basha doli fitues pasi rezultoi në fillim humbës ndaj Ramës, në garën për Bashkinë e Tiranës. /teshesh.com/
