Kërkesa e deputetëve të Listës Serbe që sa më parë të formohet Asociacioni i Komunave me Shumicë Serbe dhe njëkohësisht të anashkalohet formimi i ushtrisë së Kosovës nuk po komentohet nga qeveria “Haradinaj”, pjesë e së cilës është edhe partia më e madhe serbe.
Zëdhënësi i qeverisë, Arbër Vllahiu, ka deklaruar se ekzekutivi është duke punuar për transformimin e FSK-së në Forcë të Armatosur, mirëpo nuk ka treguar se kur do të ndodhë një gjë e tillë dhe si do të tejkalohen kundërshtimet e Listës Serbe.
Ai në një prononcim për “Zërin” ka thënë se procesi i formimit të ushtrisë do të përmbyllet në bashkëpunim të plotë me NATO-n dhe me partnerët ndërkombëtarë.
“Qeveria e Kosovës po punon seriozisht në çështjen e transformimit të FSK-së në FAK, si procesi më i rëndësishëm në këtë periudhë. Qeveria e Kosovës po punon intensivisht që transformimi i FSK-së në Forcat e Armatosura të jetë një hap i përbashkët për anëtarësimin e Kosovës në NATO, por nuk është e ndërlidhur me datë të kufizuar. Ky proces si i tillë do të përmbyllet në bashkëpunim të plotë me të gjitha institucionet vendore, me NATO-n dhe me partnerët ndërkombëtarë”, ka thënë ai. /tesheshi.com/
