Çmimet evropiane të gazit rriten pasi urdhri i Vladimir Putin për mobilizim të pjesshëm ushtarak në Rusi rindez shqetësimet për frontin ushtarak në Ukrainën lindore.
Më konkretisht, kontratat e së ardhmes TTF në Bursën e Amsterdamit janë rritur me të paktën 9% dhe janë rikthyer mbi pragun psikologjik prej 200 € për megavat orë, duke arritur në 213 € për megavat orë (në shtator 2021 ato nuk i kalonin 65 € / megavat orë).
Nivelet e përmendura janë më të lartat në një javë të fundit dhe janë rezultat i fjalimit të ri televiziv të presidentit rus, i cili njoftoi rekrutimin e rreth 300,000 rusëve.
Trupat shtesë pritet të dërgohen në Ukrainën lindore, për të ndalur kundërsulmin e ushtrisë ukrainase, por edhe për të siguruar mbajtjen e referendumeve të paralajmëruara në Zaporizhia, Kherson, Donetsk dhe Luhansk.
Këto janë zona të Ukrainës, të cilat janë nën kontrollin ushtarak dhe administrativ rus. Qëllimi i referendumeve është “legjitimimi” i “bashkimit” me Rusinë dhe krijimi i një fakti të kryer nga ana e Moskës, ashtu siç ndodhi në rastin e Krimesë në 2014.
“Ne do të diskutojmë hapat që duhen ndërmarrë për të mbrojtur sovranitetin tonë dhe do të mbështesim vullnetin dhe dëshirën e qytetarëve në Donbas për të vendosur vetë”, tha ndër të tjera Vladimir Putin.
Nga ana e saj, presidentja e Komisionit Evropian, Ursula von der Leyen, dënoi planet për të mbajtur referendume në katër rajonet e Ukrainës, të cilat ajo i cilësoi si shkelje flagrante të Kartës së OKB-së.
E gjithë kjo, në çdo rast, ngre shqetësime të reja për Kontinentin e Vjetër, i cili duhet të menaxhojë krizën e tij më të keqe energjetike në 10 vitet e fundit, ndërkohë që kërcënimi i Moskës për të “ngrirë” rrjedhat e gazit natyror përmes gazsjellësit Nord Stream 1 mbetet në tavolinë.”
“Komentet e sotme nga presidenti rus sigurisht që do të rrisin çmimet evropiane të gazit,” tha Tom Marzec-Manser, kryeanalist në ICIS. “Shqetësimet për flukset dhe zhvillimet ushtarake janë ndër shqetësimet kryesore të tregtarëve,” shton ai, duke folur për Bloomberg.
Për momentin, rezervat e gazit të Evropës janë në 86% të kapacitetit total, që është pak mbi mesataren e 5 viteve të fundit. Kjo, në mënyrë të arsyeshme, siguron disa “masë” për rrezikun e një ndërprerjeje të ardhshme në rrjedhat ruse.
“Situata për dimër është e menaxhueshme, por gjërat mund të bëhen disi më të vështira. Kjo është arsyeja pse nuk ka vend për vetëkënaqësi”, thekson Monika Zsigri, kreu i Task-Forcës Evropiane për Energjinë. /tesheshi.com/
