Një lajm “diversant” është shpërndarë dje nga disa media dhe portale që duket se ishte sajuar, prodhuar dhe shpërndarë nga qarqe që nuk veprojnë në dritë të diellit.
Kështu, në eter u transmetua një “video” në terr, ku thuhej se kreu i Inspektoratit të Lartë të Deklarimit të Pasurive dhe Konfliktit të Interesit, Shkëlqim Ganaj, po zihej me komshinjtë me grushta.
Kush e njeh Ganajn e di mirë që ai nuk para zihet, po nejse, edhe mund të ndodhë, por në video nuk shihej asgjë, ishte errësirë totale.
Ndërkaq, siç mësohet kjo video është sajuar pikërisht pas një denoncimi që ka shkuar në prokurori për një kërcënim ndaj personit kryesor në Shqipëri i cili po ndjek lekët e zyrtarëve të korruptuar shqiptarë.
Nësohet gjithashtu se ILDKPKI-ja po bashkëpunon ngushtë me institucione dhe agjenci të rëndësishme patnere që merren me luftën ndaj korrupsionit dhe pastrimit të parave.
Prokurori amerikan që po asiston organin shqiptar të akuzës në luftën ndaj korrupsionit, Gjon Vuçaj, po punon ngushtë me zyrën që drejton Ganaj për të zbardhur pasurinë e fshehur e zyrtarëve shqiptarë, kryesisht të gjyqtarëve dhe prokurorëve, për të cilët kanë dyshime që kanë përfituar pasuri me korrupsion dhe abuzim me detyrën.
Prej kohësh ka raporte sekrete që theksojnë se zyrtarë të rëndësishëm kanë transferuar shuma apo kanë investuar në parajsa fiskale që ato kthehen më pas të lara dhe të paidentifikueshme.
Qipro, por edhe disa shtete të Gadishullit të Indokinës, kanë qenë objekt i vizitave të inspektorëve të inspektoratit që gjurmon paratë e shteterëve.
Siç mësohet, pas një vizite në një nga këto parajsa fiskale ku është arritur një rezultat, ka sjellë edhe incidentin që më pas dje u shit në mënyrë të çuditshme si sherr me komshinjtë, por që nuk ka qenë fare i tillë.
Një ditë më pare, përfaqësuesit e Bashkimit Europian por edhe të Shteteve të Bashkuara në Shqipëri, jo thjesht kanë akuzuar për korrupsion pjesë të drejtësisë, por kanë përdorur fjalë që u duk se ishin replikë me disa nga më të spikaturit.
Për shembull, ambasadorja e BE-së në Shqipëri, Romana Vllahutin tha hapur se nuk mund të fshihen paratë me bisneset e bashkëshorteve.
Dhe në fakt një ditë më parë, gjyqtari i Apelit Gjin Gjoni, anëtar i KLD-së tha se ai ishte i pasur pasi bashkëshortja e tij ishte biznesmene e suksesshme.
Ndërkaq, një tjetër përfaqësues i rëndësishëm ndërkombëtar dha edhe një propozim më radikal: Të largohen e gjithë trupa prej 800 zyrtarësh dhe të zëvendësohen me të rinj.
Rainer Deville, ekspert ndërkombëtar i misionit Euralius, foli për një lidhje direkte të drejtësisë shqiptare me përfaqësues të krimit të organizuar dhe mafias.
“Nëse ju, paradite keni një proces gjyqësor, e pasdite uleni e hani darkë me dikë të dyshimtë nga krimi i organizuar, atëherë edhe këtu ka një problem. Pra, mos u ulni të pini kafe me njerëz të dyshimtë të krimit të organizuar, apo shefin e mafias. Nëse nuk uleni të pini kafe të tilla, atëherë nuk keni përse shqetësoheni. Në qoftë se ju shkruani vendime të pakuptimta, atëherë ju realisht keni një problem. Atëherë ju duhet të largoheni nga puna. Kjo reformë është serioze. Nuk ka më tolerime për këdo, që është përfshirë në korrupsion dhe është mirë të ndalojë”, tha Rainer Deville. /tesheshi.com/
