Nga Blendi Gashi
Ndonëse pritej që të gjindet një konsensus mes partive në koalicion, PDK-LDK me partnerin e tyre, Listën Serbe që marrin pjesë në seancën për ratifikimin e Demarkacionit, marrëdhëniet mes tyre janë acaruar tej mase pas miratimit të ligjit për “Trepçën”.
Lista Serbe në seancën e djeshme këmënguli që ky ligj të shtyhet duke thënë se kjo çështje që duhet të zgjidhet me dialog e jo me projektligj.
Por kjo kërkesë e “Srpska-s” nuk u miratua nga ligjvënësit dhe përkundër pakënaqësive të deputetëve serbë, u vazhdua më tej me miratimin e ligjit, kuptohet pa praninë e tyre.
Këmbëngulësia dhe vendosmëria e kryeministrit Mustafa e paraqitur qysh në fillim të seancës për miratimin e ligjit në fjalë, më së shumti e nervozoi deputetin Nenad Rashiq, që dikur kishte marrëdhënie tejet të mira me dy partitë në koalicion, pasi edhe vetë ishte pjesë e qeverisë si ministër i Punës dhe Mirëqenies Sociale gjatë qeverisë “Thaçi 2”.
Rashiq dje para ligjvënësve kosovarë tha se nëse ligji për “Trepçën” kalon, marrëdhëniet me komunitetin serb do të lëndohen shumë. Madje, ai kërcënoi se ligji që nuk mbështetet prej tyre, nuk do të mund të jetë i implementueshëm.
“Votojeni nëse doni që ligji të jetë shkronjë e vdekur. E nëse doni që me të të rregullohen çështjet, atëherë duhet konsultuar me serbët e veriut. Ky ligj do të rrënojë të gjitha komunikimet me serbët. Unë ju garantoj se me këtë qasje nuk do të keni sukses dhe nuk do të mund të jetë i implementueshëm”, tha Rashiq.
Sakaq, ndaj miratimit të ligjit për “Trepçën”, kanë ardhur reagime të ashpra edhe nga Beogradi.
Ministri i Punës në qeverinë e Serbisë, Aleksandër Vulin ka vlerësuar se miratimi i ligjit në fjalë është një përpjekje për të krijuar një precedent në drejtim të pasurive të Kosovës në krahinë si dhe përpjekje për të destabilizuar vendin.
Ai ka thënë për RTS se miratimi i ligjit për të vendosur rregull dhe çdo gjë në territorin e Kosovës i takon qeverisë së saj, por jo kështu siç po bën tani.
“Mirëpo, qeveria po mundohet që të bëj një situatë të vështirë e cila as nuk mund të kontrollohet. Rajoni aktualisht është shumë i ndjeshëm për shkak të asaj që ka ndodhur në Bosnje e Hercegovinë sidomos pas zgjedhjeve të fundit. Por politikanët janë duke u përpjekur që situatën ta bëjnë të paqëndrueshme”, ka thënë Vulin.
“Do të bisedojmë me deputetët e ‘Srpska-s’ që t’i tejkalojmë keqkuptimet”
Por këtyre deklaratave të deputetëve serbë të Kosovës dhe ministrave të Serbisë, i kundërpërgjigjet qeveria e Kosovës, e cila thotë se miratimi i ligjit për “Trepçën”, është interes i të gjithë qytetarëve të vendit pa dallim etnie.
Bajram Gecaj, këshilltar i kryeministrit Mustafa thotë se shpreson që të ulen tensionet e ngritura së fundmi dhe kjo çështje të shihet ashtu siç është, pa konotacione politike dhe etnike por si interes i përgjithshëm i qytetarëve.
“Ne do të vazhdojmë të bisedojmë me ministra dhe deputet të Listës Serbe në mënyrë që të tejkalojmë të gjitha keqkuptimet e mundshme”, ka thënë Gecaj, për tesheshi.com.
“Nenad Rashiq i manipuluar nga qarqe të Serbisë”
Edhe kryetari i komisionit kuvendar për zhvillim ekonomik, Muhamet Mustafa, njëherit deputet i partisë në pushtet, LDK-së thotë se ligji i miratuar për “Trepçën”, është në të mirë të gjithë punëvetorëve të “Trepçës”, pra edhe të atyre serb.
Deputeti Mustafa thekson se frika e deputetit serbm Nenad Rashiq është e paarsyeshme dhe produkt i manipulimit të madh që bëjnë qarqe rigjide të qeverisë së Serbisë.
“Rashiq si duket nuk e stdudiuar ligjin për ‘Trepçën’, dhe fatkeqësisht flet me paragjykime. Serbët me këto kundërshtime vetëm mund të dëmtojnë puntorët serb në ‘Trepçë’ dhe shpresoj se këtë do ta kuptojnë shpejtë”, thotë deputeti Mustafa, për tesheshi.com.
Ndryshe, drejtori i zyrës për Kosovën në qeverinë e Serbisë, Marko Gjuriq në një konferencë të mbajtur sot për media tha se Serbia do t’i propozojë qeverisë për të kërkuar një takim urgjent të Këshillit të Sigurimit të OKB-së për shkelje të Rezolutës 1244.
“Vendimi i institucioneve të Prishtinës mbi konfiskimin e minierave në kombinatin ‘Trepça’ nuk është i vlefshëm për qytetarët, bizneset dhe qeverinë e Serbisë”, tha Gjuriq. /tesheshi.com/
