Nga Blendi Gashi
17 vjet pas çlirimit, Kosova u kërcënua me kthim të tytave armësh nga Serbia, pasi nuk u lejua të hyjë një “tren rus” në Mitrovicën e Veriut.
Dhe çuditërisht, kjo gjendje e acaruar e gjeti politikën kosovare jo unifikuese, të përçarë prej afro dy vitesh që “luftojnë” njëra-tjetrën, sigurisht për pushtet.
Duke parë se shteti serb do vazhdojë provokimet, ku “muri” dhe Asociacioni do jenë sfidat e radhës, shihet urgjente që liderët politikë të lënë prapa inatet, dhe rrahagjokset se kush e ndali trenin, dhe të ulën në një tyrezë për të biseduar për situatën e krijuar së fundmi.
Është deputeti i pavarur, Ilir Deda që ka bërë thirrje për organizimin e një tryeze të tillë, pas kërcënimit serioz ndaj integritetit territorial të shtetit nga ana krerëve serbë.
“Kosovës i duhet konsensus i plotë politik. Ky konsenzus mbrrihet me një tryezë të liderëve të partive politike në pozitë dhe opozitë ku duhet të ketë dakordim për agjendë, pozicion, dhe qëndrim të ri të Kosovës karshi këtij kërcënimi. Këtu duhet të përfshihet dakordimi për fuqizim të FSK-së në ushtri dhe dakordim për qasje te re në procesin e Brukselit”, thotë Deda për tesheshi. com.
Por kjo iniciativë e Dedës nuk po gjen përkrahje tek opozita e cila thotë se nuk ulet në një tryezë me liderët që e kanë sjellë vendin në gjendjen deri në atë pikë sa që të kërcënohet me luftë nga serbët.
Shkodran Hoti, zyrtar për media në Vetëvendosje thotë se hapi i parë dhe më i rëndësishëm që duhet të ndërmerret ndaj Serbisë është ndërprerja e dialogut, i cili është pa kushte e pa parime, sepse shteti në fjalë nuk ndryshon duke iu nënshtruar, por duke e kushtëzuar.
“Ne nuk besojmë që ky pushtet i cili ishte servil ndaj Serbisë gjatë çdo procesi negociator që do të mund të nxjerrë agjendë shtetërore. E kemi parë edhe nga e kaluara se tryezat e shumta për çështje të ndryshme kanë rezultuar të pasuksesshme si pasojë e kokëfortësisë dhe arrogancës së qeverisë, si pasojë e mungesës së vullnetit nga ana e tyre për zgjidhje krizave dhe problemeve të ndryshme. Sidoqoftë, duhet parë se çka njëmend do të kishte për synim në mënyrë të detajuar një tryezë e tillë, por deri ndërprerja e dialogut është veprimi që do të duhej të ndermerrej qysh tani”, thotë Hoti për tesheshi. com.
Valdete Bajrami, shefe e grupit parlametar të NISMA-s thotë se kërcënimet që vijnë nga Serbia janë produkt i politikave nënshtruese të qeverive kosovare që nga fillimi i dialogut jo parimor në vitin 2011.
“Prandaj, tryezat me këta politikan që me politikat e tyre nënshtruese e kanë trimëruar Serbinë nuk kanë asnjë kuptim. Koha e tryezave me lidërët që e kanë sjellë vendin në këtë gjendje ka kaluar. Tani koha është për ndërprerjen e këtij dialogu dhe shkuarja në zgjedhje të parakohshme. Ata që do të marrin mandat nga populli për të qeverisur në mandatin e ardhshëm do të kenë legjitimitet të marrin vendim se si duhet të veprohet edhe me dialogun me Serbinë”, thotë Bajrami, për tesheshi. com.
Ndryshe, kryeministri Mustafa ka bërë të ditur ditë më parë në mbledhjen e qeverisë se dialogu do vazhdojë sepse është e vetmja mënyrë për të normalizuar marrëdhëniet me Serbinë. /tesheshi.com/
