Presidenti Trump ka thënë se “armët bërthamore që i posedojnë Shtetet e Bashkuara janë më të fuqishme se kurrë më parë”.
“Deklarata ime e parë si president ishte ripërtërja dhe modernizimi i arsenalit tonë bërthamor. Ai tani është më e fortë dhe më i fuqishëm se kurrë më parë”, ka shkruar Trump në llogarinë e tij në Twitter.
Ai ka shtuar se shpresonte që Shtetet e Bashkuara “nuk do të kenë nevojë që ta përdorin kurrë këtë armë, por edhe se nuk do të vijë ndonjëherë ajo kohë kur Shtetet e Bashkuara nuk do të jenë kombi më i fuqishëm në botë”.
Sekretari amerikan i Shtetit, Rex Tillerson kishte thënë më parë se ai nuk besonte se Koreja e Veriut paraqet kërcënim të drejtpërdrejtë për Shtetet e Bashkuara, e as për territorin amerikan të Paqësorit, Guam.
“Amerikanët mund të flejnë pa merak. Nuk kanë nevojë të shqetësohen për këtë retorikë të ditëve të fundit”, u tha Tillerson gazetarëve, pas kërcënimeve të ashpra dhe paralajmërimeve që janë shkëmbyer midis Koresë së Veriut dhe presidentit Trump.
Ai relativizoi spekulimet se këto kërcënime e afrojnë SHBA-në kah opsioni ushtarak, duke thënë se asgjë që ka parë apo dëgjuar të martën nuk do të ndryshojë në mënyrë dramatike situatën, raporton AP.
Koreja e Veriut ka deklaruar paraprakisht se “po konsideron me kujdes planin për një sulm me raketa”, dhe këtë paralajmërim e ka dërguar vetëm disa orë pasi presidenti amerikan Donald Trump tha se çdo kërcënim ndaj Shtetet e Bashkuara do të përballet me “zjarr dhe tërbim.”
Tillerson shpjegoi se Trump dërgoi një mesazh të tillë për shkak se lideri i Koresë së Veriut “nuk e kupton gjuhën diplomatike”.
Ai foli me gazetarët rrugës nga Malajzia për në Uashington përmes Guam-it, ku avioni u ul shkurtimisht për t’u furnizuar me karburant. /tesheshi.com/
