Presidentja Vjosa Osmani dhe bashkëshorti i saj Prindon Sadriu janë kërcënuar nga ish-ambasadori i Kosovës në Maqedoninë e Veriut, Gjergj Dedaj.
Ky i fundit ka paralajmëruar për hakmarrje me Kanun, me arsyetimin se ndihet i rrezikuar, siç pretendon, nga “Klani Osmani“.
Dedaj tha në media se është njeri i ligjit, por se nuk duhet harruar se nga vjen Malësia e Gjakovës, e ku vepron Kanuni i Lekë Dukagjinit.
Gjithashtu ai ka shtuar se nëse dikush e shkel ose e vret, do ta vrasë edhe ai.
“Unë jam i ligjit, mirëpo na jemi shqiptarë. Nuk mundesh dikë që ja ki inati me e vra. Unë jam i rrezikum nga Klani i Osmanit, i Vjosës dhe bashkëshorti i saj, nga njerëzit e saj dhe të listës ‘Guxo’.
Nuk di që duhet me pasë kërcënim tjetër kur ta rrezikon jetën, të len të paftyrë, të hejk prej lustës së pagave.
Përveç ligjit të unë dhe familja ime te Malësia e Gjakovës vepron edhe kanuni i Lekë Dukagjinit. Nëse me shkel dikush, me vret dikush ka mu vra edhe ai. Edhe ai ka me pas pasoja. Presionin që janë kah ma bajnë”, ka thënë ish-ambasadori Gjergj Dedaj, i njohur dhe më parë për deklarime që provokojnë reagime dhe debat.
Ndër të parat reagime qe ai këshilltarit të znj. Osmani, Bekim Kupina.
“Një person totalisht i papërgjegjshëm që për shkak të interesave meskine dhe prapaskenave të ulëta është katapultuar në pozitën e ambasadorit pa i plotësuar kriteret themelore. Manipulon, përvetëson dhe kërcënon kreun e shtetit. Pa asnjë hezitim, ai përdorë deklarimin në një emision live për të bërë kërcënim kundër jetës dhe sigurisë ndaj Presidentes Osmani dhe familjes së saj, për të cilën gjë ai do të denoncohet në organet e rendit”. /tesheshi.com/
