Sot paradite pritet të “ngujohen” në sallën e “delegacioneve” Ilir Meta, Edi Rama, ambasadorët Lu dhe Vllahutin, si dhe Lulzim Basha.
Të gjithë përveç kryetarit të Partisë Demokratike kanë konfirmuar ardhjen në takim.
Basha pritet të japë përgjigje sot në mëngjes, pasi të kthehet nga Holanda ku shkon zakonisht fundjavave.
Ambasadorët e SHBA-së dhe BE-së i janë përgjigjur Metës pas një mbledhje që kanë zhvilluar në Tiranë diplomatët e 6 vendeve kryesore të BE-së dhe zoti Lu.
Ata kanë bërë thirrje që sot në takimin për reformën të diskutohet vetëm për propozimin hibrid të zonjës Nuland, ndërsa Meta nuk e ka përmendur këtë, por ka folur vetëm për konsensus, pra që mazhoranca të tërhiqet në variantin që do PD-ja. Vetë Basha, më shumë se njëherë i ka kërkuar Ramës që të votojë variantin e PD-së që ka në tryezë.
Megjithatë, burime pranë mazhorancës kanë bërë të ditur për tesheshi.com se Ilir Meta, ka përdorur të gjithë “artilerinë e rëndë” politike dje kundër Edi Ramës dhe ambasadorëve, pasi nuk ka siguri për të gjitha votat e LSI-së.
Duket diçka jo shumë reale në rastin e Metës që kontrollon gjithçka, por këtë herë gjasat janë mjaft të mundshme.
Ndërkaq, në lidhje me skenarin e zgjedhjeve të parakohshme dhe një qeverie teknike, është një variant që është përgatitur më parë dhe i pritshëm prej kohësh.
Madje tesheshi.com e ka shkruar i pari që prej një muaji. Ndërkombëtarët nuk duan që 20 votat e Ilir Metës të jenë jetike për reformën në drejtësi, pasi do ta faktorizonin atë në maksimum.
Ndaj po shtyhet për një reformë Rama-Basha, në mënyrë që më pas, një qeveri e përfshirë nga mazhoranca që votoi reformën, të zgjedhë kryeprokurorin dhe të gjithë drejtuesit e trupave të rinj të gjyqësorin.
Më tej, para zgjedhjeve të ardhshme pritet të nisë operacioni i arrestimeve të mëdha. Në këtë atmosferë do të zhvillohen zgjedhjet e ardhshme të vitit 2017 si dhe zgjedhja e Presidentit të ri të Republikës.
Skenari i ndërkombëtarëve, është që Ilir Meta të mos jetë në qeveri para zgjedhjeve, gjë që do të ndalonte influencën e Metës në zgjedhje, siç ka ndodhur gjithmonë me LSI-në, e cila fuqinë e ka pikërisht tek influence e vendeve të punës.
Ilir Meta e ka ditur gjithmonë këtë qëndrim të SHBA-së, madje ka luajtur të gjithë letrat nën rrogoz që të ndryshojë situatën. Ka paguar lobistë në Uashington, ka takuar personalitete të rëndësishme në SHBA që të influencojë një zbutje të qëndrimit amerikan, veprime që e kanë armiqësuar edhe me ambasadorin Donal Lu.
Gjithashtu Meta ka futur duart brenda PS-së duke i bërë të ditur Edi Ramës që do t’i marrë një numër “senatorësh” duke nisur nga Arta Dade, Anastas Angjeli, por edhe njeriun deri dje të afërt me kryeministrin: Koço Kokëdhima.
Por asgjë nuk e ka bërë Edi Ramën të tërhiqet, edhe kur i ka shpërthyer skandale kundër Saimir Tahirit. Prokurori i Përgjithshëm ka në dorë madje një fletë arresti ndaj ministrit të Brendshëm gati për ta ekzekutuar.
Por, me të gjitha këto Edi Rama ka mbajtur vetëm një linjë: atë që mban SHBA dhe BE-ja.
Ndaj Ilir Meta kundër krejt natyrës së tij në tre vitet e fundit për “qetësi e dashuri” shpërtheu kundër ambasadorëve dhe normalisht aleatit të tij Edi Rama, duke i kujtuar qeverinë teknike dhe ikjen nga koalicioni.
Numrat do të bëhen të ditur sipas gjasave, të enjten në orën 10.00.
Këto ditë pritet të hidhen edhe provokime më të mëdha, deri edhe kërcënime për destabilizim. Berisha, dy ditë më parë përmendi 21 janarin. Por deri të enjten Edi Rama do të shtrëngojë dhëmbët…/tesheshi.com/
