Nga Blendi Gashi
Ndërsa Kosova po vlon nga probleme të shumta, por që pushteti aktualisht është i preokopuar me bërjen e ushtrisë dhe ratifikimin e Demarkacionit me Malin e Zi, së fundmi i ëshë paraqitur edhe një shqetësim i ri. Konkretisht ka dalë në skenë e ashtuquajtura organizatë me emrin “Syri i Popullit”, në krye me Murat Jasharin, që plagosi avokatin Azem Vllasi për shkak të kaluarës së tij politike duke paralajmëruar hakmarrje ndaj të gjithë “tradhëtarëve” të tjerë.
Duke e vlerësuar si një çështje tejet të ndjeshme, tashmë sytë e institucioneve janë drejtuar kah hetimi i kësaj organizate pasi ajo ka paralajmëruar përgatitjen e atentateve të tjeraa kundër njerëzve të politikës në përgjithësi, kësaj aktuale në pushtet dhe jo vetëm.
Se bëhet fjalë për një çështje mjaft delikate e pranoi edhe presidenti Hashim Thaçi i cili mbrëmë në emisionin “Click” në RTV 21, fenomenin në fjalë e cilësoi terrorist që sipas tij nuk mund të injorohet.
“Janë 26 persona në listë për t’u ekzekutuar. Aty janë liderë institucionesh, liderë të partive politike, udhëheqës fetar, gazetar dhe opinionistë. Në këtë listë ka edhe komandant zonash të UCK-së. Nuk e di tash kush s’po mbetet tradhëtarë në këtë vend”, tha presidenti.
Ai ka thënë se me këtë çështje do të merret drejtësia, duke shtuar se kjo organizatë është në shërbim të shërbimeve të huaja dhe atë rus.
“Askush nuk mund të injorojë këtë fenomen që për mua është definitivisht terroris. Gjithçka ka qenë e menduar, e planifikuar, me motiv të qartë politik“, ka thënë Thaçi.
Por si duhet vepruar institucionet e sigurisë dhe a duhet t’iu ofrojnë mbrojtë personave që janë në listë, tregojnë ekspertët e sigurisë.
Njohësi i çështjeve të sigurisë, Hajrullah Tërnava kërcënimet e organizatës “Syri i Popullit” i quan tejet serioze për personat që janë në listë por jo vetëm.
“Kërcënimet janë tepër serioze sepse u pa edhe në vepër se u bë atentat ndaj një ish-udhëheqësi komunist, i cili ishte edhe i burgosur në vitin 1989 nga rezhimi i Millosheviqit si iridentist i asaj kohe, dhe mbajti mbi një vjet burg. Shtrohet pyetja kush janë këta persona që bëjnë atentate të tilla? Cilët janë më të mëshirshëm, ata që ishin udhëheqës dhe lëshuan kolltuket kur e kuptuan se rezhimi i Millosheviqit po bën zullum ndaj ndaj shqiptarëve dhe protestuan bashkë me popullin, edhe pse mund të kenë bërë ndonjë gabim, apo ‘patriotat’ e kësaj organizate’. Me cilat kriterie po shërbehen me këto likuidime? Athua pse nuk po e presin Gjykatën Speciale që fillon punën muajve në vijim, dhe nëse nuk dënohen ata që e meritojnë, të protestojnë”, thotë Tërnava, për tesheshi. com.
Sipas tij të gjithë ata që janë të përfshirë në këto akte terroriste do duhej ta pyesin vetën se kujt po i bëjnë argat.
Tërnava thotë se të gjithë ata që synojnë të kryejnë akte të tilla nuk ia duan të mirën vendit, por kanë për qëllim anarkinë dhe jo funksionim të ligjeve.
“Vet fakti se ekzekutorët në rastin Vllasi, nuk janë shtetas apo nuk jetojnë në Kosovë, ka gjasa se inspirimin armiqësor e marrin nga shërbime të shteteve të ndryshme.
Andaj ndaj ata persona që janë në shënjestër të grupit ‘Syri i Popullit’ duhet të mbrohen nga policia derisa të përfundojnë hetimet”, thotë eksperti Tërnava.
Policia pas tentim vrasjes ndaj Vllasit dhe kërcënimeve se mund të rrezikohet jeta edhe shumë personave tjerë ka shtuar masat e sigurisë.
Zëdhënësi i policisë, Baki Kelani ka deklaruar për media se “policia konform hetimeve dhe vlerësimeve të saja, në koordinim dhe bashkëpunim me organet e drejtësisë lidhur me rastin në fjalë ka ndërmarrë dhe do të ndërmerr veprimet e mëtutjeshme policore, duke përfshirë edhe shtimin e sigurisë”.
Ndryshe, e ashtuquajtura organizata “Syri i Popullit” përveç që ka marrë përsipër plagosjen e kanë quajtur Vllasin ka paralajmëruar se nuk do të ndalet me kaq, duke thënë se do të hakmerren ndaj të gjithë atyre që kanë marrë votën e popullit dhe asgjë nuk kanë bërë për popull, por janë korruptuar e pasuruar mbi gjithë ata që në emër të luftërave çlirimtare janë pasuruar dhe për popull nuk kanë bërë asgjë. /tesheshi.com/
