Shtetet e Bashkuara kanë reaguar pas kërcënimit rus në lidhje me rrëzimin e avionit sirian nga forcat e koalicionit anti-ISIS në Siri.
“Do të bëjmë atë që të mundemi për t’i mbrojtur interesat tona. Regjimi sirian duhet ta kuptojë se kemi të drejtën e vetëmbrojtjes përballë Shtetit Islamik”, tha zëdhënësi i Shtëpisë së Bardhë, Sean Spicer.
Deklarata e tij pasoi paralajmërimet e Moskës se avionët amerikanë në vendin e trazuar mund të jenë shënjestra sulmesh nga ana e saj.
Të dyja palët janë përfshirë në goditjen nga ajri të grupeve terroriste në Siri, por të hënën tensionet u përshkallëzuan pasi amerikanët rrëzuan një avion luftarak të qeverisë siriane, i cili ishte duke bombarduar një zonë ku vepronin rebelë të mbështetur nga Uashingtoni.
Zëvendësministri i Jashtëm rus, Sergei Ryabkov e cilësoi episodin një “akt agresioni” dhe tha se linja për parandalimin e aksidenteve ajrore mbi Siri është ndërprerë.
Spicer këmbëngul se SHBA do të vazhdojë të punojë me partnerët për të luftuar kërcënimin e ISIS në Siri.
Nga ky moment, sipas rusëve, avionët e tyre do të gjurmojnë çdo avion amerikan dhe mund të hidhen në veprim nëse shohin se ata kthehen në kërcënim për avionët e Damaskut./tesheshi.com/
