Brukseli është privuar nga festimet dhe fishekzjarret gjatë ndërrimit të viteve. Zbulimi i një plani për ta goditur qytetin gjatë festimeve i ka detyruar autoritetet belge t’i anulojnë aktivitetet festive.
Vendimi u mor të mërkurën, ndërsa nuk do të ketë festime dhe fishekzjarre në qendër të Brukselit.
Kryebashkiaku i Brukselit, Yvan Mayeur, do të deklaronte, “Fatkeqësisht jemi të detyruar t’i anulojmë fishekzjarret dhe gjithçka që qe planifikuar për mbrëmjen e sotme.”
Sipas tij, ishte e pamundur që të kontrollohej çdo njeri që do të bëhej pjesë e festimeve, duke parë si më të udhës mosmarrjen e asnjë rreziku.
Kryeministri belg, Charles Michel, e shpjegoi po ashtu si shumë të vështirë vendimin për anulimin e festimeve, por si të drejtë.
Brukseli ka qenë vijueshmërisht në gjendje alarmi që prej sulmeve të përgjakshme në Paris në mesin e nëntorit të këtij viti. /tesheshi.com/
