Zhvillimi i inteligjencës artificiale (AI) mund të kërcënojë punën e pothuajse 80 për qind të grave në SHBA, sipas një studimi të ri nga Shkolla Kenan-Flagler e Universitetit të Karolinës së Veriut.
Rreth 59 milionë gra të punësuara në SHBA janë të angazhuara në profesione që kërcënohen nga automatizimi dhe zhvillimi i AI, raporton CNN.
Burrat e punësuar janë gjithashtu të ekspozuar ndaj këtij rreziku, por në një masë më të vogël, pasi përparimet e AI janë një kërcënim potencial për 58 përqind të fuqisë punëtore meshkuj.
Kryeekonomistja e ZipRecruiter Julia Pollack i quajti këto rezultate “tronditëse”, por shprehu shpresën se zhvillimi i AI do të krijojë vende pune dhe mundësi të reja.
Niveli historik
Sipas të dhënave të muajit maj të Departamentit Amerikan të Punës, pjesëmarrja e femrave nga mosha 25 deri në 54 vjeç në tregun e punës në SHBA ishte në nivelin 77.6 për qind, që është më e larta në histori.
Autori kryesor i hulumtimit të lartpërmendur, Mark McNeilly, thekson se gratë janë më të pranishme në fusha të tilla si zyra dhe punët administrative, në shëndetësi, arsim, shërbime të mirëqenies sociale ose bibliotekari.
Sipas tij, zhvillimi i AI nuk do të thotë gjithmonë që dikush automatikisht do të humbasë punën.
“Pyetja e vërtetë është nëse ai person mund të bëjë diçka më shumë për të rritur vlerën e tij në tregun e punës,” thotë McNeilly. /tesheshi.com/
