Policia e Kosovës ka nisur hetimin në lidhje me kërcënimet ndaj presidentit Thaçi, kryetarit të komunës së Prishtinës Shpend Ahmeti, deputetit të VV-së Albin Kurti dhe kreut të Bashkësisë Islame të Kosovës Naim Tërnava.
Lajmin e ka konfirmuar zëdhënësi i policë për rajonin e Prishtinës, Agron Borovci. Sipas tij, policia aktualisht po trajton rastin dhe po punon për të sqaruar dhe zbardhur rrethanat e ngjarjes.
“Policia po bashkëpunon me prokurorin e shtetit për veprimet e mëtejshme hetimore lidhur me rastin. Policia aktualisht po trajton rastin dhe po punon për të sqaruar dhe ndriçuar rrethanat që karakterizojnë rastin. Policia po bashkëpunon me Prokurorin e Shtetit për veprimet e mëtejshme hetimore lidhur me rastin”, tha ai.
Borovci ka sqaruar policia ka intervistuar dëshmitaret e parë të këtij rasti.
“Aktualisht policia ka filluar me intervistimin e dëshmitarëve të mundshëm. Kërkojmë nga të gjithë të cilët kanë ndonjë informacion shtesë lidhur me rastin që ta përkrahin policinë në hetimin dhe identifikimin e personave”, ka thënë Borovci. /tesheshi.com/
