Tenistja gjermane Angelique Kerber ka fituar turneun e fundit Grand Slam të vitit, US Open, për t’u ngjitur në vend të parë në renditjen botërore.
Një sezon i jashtëzakonshëm për gjermanen, që e ka parë veten të luajë në tre finale Grand Slam-i, duke i fituar dy prej tyre.
Kerber fitoi Australian Open-in në fillim të këtij viti, duke mposhtur në finalen Serena Williams-in. Tenistja amerikane do të merrte hak në Uimbëlldon, kur do ta bënte të sajin trofeun në përballjen rishtas me gjermanen.
Si e para teniste gjermane që e fiton turneun US Open që prej vitit 1996, kur e fitonte Steffi Graf, Kerber e kishte siguruar vendin e parë në botë që me humbjen e Serena Williams-it në gjysmëfinale.
Finales mes Kerber-it dhe Pliskova-s i kishte paraprirë finalja një muaj më parë në turneun e Cincinnati-t, të fituar nga çekja 24-vjeçare.
Ka qenë një finale e luftuar fort kjo e US Open-it, me një set të parë të dominuar nga Kerber e të fituar 6-3, e me një të dytë ku Pliskova e ka kthyer përmbys lojën, duke fituar 6-4.
Jashtëzakonisht e ftohtë në lojë, Karolina Pliskova do ta kishte dhe setin e tretë në dorë, e ngjante se po shkonte drejt fitores teksa po kishte sukses me topat e shkurtër.
E fortë fizikisht, shumë më mirë në topat e gjatë, Kerber e kthen erën në favor të saj në mesin e setit final, për ta fituar atë në fund 6-4. Kerber fiton me sete 2-1, dhe bën të vetin trofeun e dytë sezonal në Grand Slam-et.
“Kur isha fëmijë, gjithmonë ëndërroja të jem numri një në botë dhe të fitoj Grand Slam-e, e sot është dita,” deklaroi Angelique Kerber në ceremoninë pas finales.
E dhjeta në botë në fillim të 2016-tës, ajo është tani tenistja numër një! /tesheshi.com/
