Petraq Milo, ekspert ekonomie, ish-këshilltar i Berishës për lëminë e vet kur ky i fundit qeveriste, tashmë dhe i Metës, është keqatrajtuar pabesueshëm nga policë malazezë në doganën e Murriqanit, në kthim nga Mali i Zi, për të hyrë në Shkodër.
Pamjet që tashmë janë bërë virale, tregojnë një akt të ulët, gati rrugaçesk, të policëve malazezë, ndaj Milos, më e rëndë akoma, në sy të familjarëve.
Së fundi raportohet se dy policë janë pezulluar dhe po hetohen për rastin e rëndë. Ka reaguar dhe kryeministri në detyrë i Malit të Zi, shqiptari Dritan Abazoviç, me një deklaratë të shkurtër, tejet të diskutueshme.
“Nuk është se dikush e ka vënë në shënjestër dikë dhe e ka nxjerrë thjesht nga makina. Dikush duhet të ketë bërë shkelje. Nuk janë respektuar rregullat e komunikacionit dhe radhët”, tha Abazoviç.
Sigurisht, nuk ka pse të vihet në shënjestër, pasi Petraq Milo nuk është nga ata për shënjestër.
Abazoviç lë gjithashtu të kuptuar se Milo mund të ketë shkelur rregullat. Po, mundet. Njeri është dhe Milo, ndonëse kurrë i njohur si karakter problematik, së paku në publik. Por sjellja e policëve është e patolerueshme, aq më tepër në sy të familjarëve. Këtë duhej të kishte theksuar Abazoviç. Ai, si shtetar, duhet ta dijë se policët trajtohen dhe për të qenë gjakftohtë, për të qenë ftohtësisht ligjzbatues institucionalë e jo horra(siç) gjaknxehtë. /tesheshi.com/
