Nga Bashkim Kastrati
Akademia e Shkencave të Kosovës (ASHAK) është institucioni më prestigjioz në aspektin e hierarkisë institucionale të nivelit intelektual. Ky institucion viteve të fundit është kritikuar për shkak të politizimit dhe ndikimit që e kanë partitë në pushtet mbi të. Edhe zgjedhjet e anëtarëve të ri të Akademisë së Shkencave të Kosovës duket se kanë dalë nga pazaret brenda partiake dhe pazareve që janë bërë ndërmjet partnerëve të koalicionit qeverisës (PDK-LDK).
Edhe pse Akademia e Shkencave të Kosovës nuk ka shumë të bëjë me menaxhime financiare dhe një dinamikë të madhe në prokurim, ka mjaftuar që dy blerje që kanë bërë edhe ato të jenë të paplanifikuara fare sipas planit buxhetor dhe rregullave të prokurimit.
Akademia e Shkencave të Kosovës shumicën e buxhetit e ka të dedikuar për paga dhe më pak për aspektet e tjera. Por pavarësisht kësaj Zyra e Auditit të Përgjithshëm të Kosovës ka gjetur disa mangësi që kanë të bëjnë me disa blerje që ka bërë instituti i shkencëtarëve.
Nga shqyrtimi i gjashtë procedurave të prokurimit auditi ka identifikuar disa dobësi në Akademinë e Shkencave.
“Ne kemi identifikuar dy blerje kapitale të cilat nuk ishin planifikuar në planin e prokurimit. Blerja e veturës për ASHAK 24,900 euro dhe blerja e pianos 24,600 euro. Përkundër që blerjet e më sipërme nuk ishin planifikuar, për to është njoftuar Agjencia Qendrore e Prokurimit. Përveç kësaj, edhe sasia e përafërt e furnizimit me tonerë nuk ishte e saktë. Edhe pse rregullat në fuqi e kanë lejuar furnizimin përtej sasisë së përafërt të përllogaritur, kjo duhet të përmirësohet në të ardhmen për tu përshtatur me rregullat e reja të prokurimit”, thuhet në raportin e auditimit.
Auditi tërheq vërejtjen se blerjet jashtë planit tregojnë për një planifikim jo të mirë dhe me kohë të nevojave të institucionit.
Në lidhje me këtë të gjetur auditi i ka rekomanduar kryetari të akademisë se duhet të sigurojë se është bërë një planifikim më i mirë i blerjeve në të ardhmen, me një koordinim më të mirë ndërmjet departamenteve dhe se një proces formal i diskutimit duhet të iniciohet për të vlerësuar nevojat për blerje dhe sasinë e përafërt.
Sipas auditit aranzhimet e qeverisjes së ASHAK-ut janë në nivel të mirë dhe se akademia ka zhvilluar një llogaridhënie, komunikim dhe bashkëpunim të brendshëm të mirë. Megjithatë, ekzistojnë disa dobësi që janë të përgjithshme dhe të cilat kërkojnë një trajtim më të mirë.
“Lista kontrolluese e vetëvlerësimit, e plotësuar nga akademia, e pasqyron këtë situatë pjesërisht, me disa komente pozitive mbi aranzhimet ekzistuese sa i përket menaxhimit të rreziqeve të cilat nuk bazohen në dëshmi. Aranzhimet tjera të cilat do ta mbështesnin zhvillimin e qeverisjes si menaxhimi i rreziqeve nuk është i vendosur ende ndonëse janë iniciuar veprime në këtë drejtim”, thuhet në raport.
Tutje në raport thuhet se Kryetari i Akademisë së Shkencave të Kosovës e ka marrë në konsideratë dhe është pajtuar me të gjeturat e detajuara dhe konkluzionet e auditimit, si dhe është zotuar se do t’i adresoj rekomandimet e dhëna.
Ndryshe, para një muaji ASHAK ka zgjedhur edhe anëtarët e ri. Anëtarë të rregullt (akademikë): Zejnullah Rrahmani, Anton K. Berishaj, Jusuf Bajraktari, Frashër Demaj, Gjyljeta Mushkolaj, Justina Pula, Muhamedin Kullashi, Fetah Podvorica dhe Myzafere Limani.
Anëtarë korrespodentë janë zgjedhur Bardh Rurgova dhe Kujtim Shala, ndërsa anëtarë të jashtëm Bahri Beci, Kristaq Prifti, Matteo Mandala dhe Mentor Petrela.
Akademia e Shkencave të Kosovës është kritikuar shpesh pasi që nuk është përfshirë në shumë zhvillime të rëndësishme që e kanë karakterizuar Kosovën në vitet e fundit. /tesheshi.com/
