Gjykata la në burg 18-vjeçarin Daniel Dobraj, i cili akuzohet si autori i lëshimit të një kapsolle drejt efektives policore Ina Nuka, ku si pasojë kësaj të fundit iu këputën gishtat, e tani ndodhet në Turqi për kurim.
Ai u shfaq në gjykatë me dorën e lidhur, si një dëshmi se dhe ai është dhunuar nga policët. Avokati i tij pretendoi se akuza është e pabazë pasi nuk ka fakte që kapsollat që ka lëshuar Dobraj të kenë dëmtuar efektiven
“Prokuroria nuk ka asnjë provë që klienti im ka hedhur kapsollin drejt efektives së policisë. Ai ka pranuar, se ka pasur kapsolla dhe i ka hedhur ato drejt llamarinave të Namazgjasë. Në lidhje me kundërshtimin e forcave të policisë, klienti ka dalë në mbrojtje të banesës së tij, nuk ka dhunë ndaj policisë. Ai nuk ka pranuar ta shoqërojnë me makinën e policisë. Paraqita para Gjykatës kërkesat e familjarëve të tij. Ka qenë një çështje minutash ku i ati e ka nxjerrë nga banesa për ta dorëzuar”, tha avokati Alfred Duka.
Siç u mësua më vonë, banesa e 18-vjeçarit që është në listë për t’u shembur në projektin e Unazës së re, ishte e hipotekuar, pra e ligjshme, dhe do të dëmshpërblehet. /tesheshi.com/
