Këngëtarja ukrainase me origjinë krimeo-tatare Yamala, e cila fitoi Eurovizionin në vitin 2016, mbajti një konferencë për shtyp në Stamboll, ku tha se arriti të arratisej në Turqi me dy fëmijët e saj për shkak të luftës në Ukrainë.
Me atë rast, ajo theksoi se civilët vazhdimisht janë të ekspozuar ndaj sulmeve të forcave ruse në Ukrainë.
“Civilët e pafajshëm kanë qenë objektiv i bombardimeve në Ukrainë për ditë të tëra. Në Kiev dhe në pjesën më të madhe të Ukrainës, civilët, gratë, fëmijët dhe të moshuarit po përpiqen të mbijetojnë disi,” tha Yamala, e cila u largua nga Kievi me fëmijët e saj pasi Rusia nisi sulmet. Ajo mbërriti në Turqi nëpërmjet Rumanisë.
Në emër të popullit ukrainas, ajo falenderoi Turqinë, popullin turk dhe presidentin Recep Tayyip Erdogan për mbështetjen e fortë.
“Turqia ka hapur plotësisht dyert e saj për shkak të përgjegjësisë dhe ndërgjegjes së saj njerëzore, duke mos pritur asgjë në këmbim, ashtu siç ka bërë me shekuj”, shtoi ajo.
Siç tha ajo, ka përjetuar shumë vështirësi derisa ka ardhur në Turqi me dy fëmijët e saj.
“Nuk e kisha menduar kurrë se do të vija ndonjëherë në Turqi si refugjate”, tha këngëtarja e njohur, duke theksuar se ata thjesht u zgjuan nga uturima e bombave mëngjesin e 24 shkurtit në Kiev, kur filloi sulmi në kryeqytetin ukrainas.
“Në fillim nuk dija çfarë të bëja, ishim shumë të pavendosur dhe të tronditur. Morëm fëmijët dhe zbritëm në strehimore. Pas pak u kthyem. Pastaj sirena ra dy herë dhe na u desh të zbrisnim përsëri në strehimore. Kuptuam se e gjithë Ukraina ishte e rrethuar dhe se duhej të largoheshim nga Kievi”, tha ajo.
Ata fillimisht u zhvendosën në Ternopil, në perëndim të vendit, duke menduar se atje ishte më e sigurt.
“Megjithatë, në orën 6:00 të 26 shkurtit, ne u zgjuam nga uturima e bombave në Ternopil, që mendova se ishte i sigurt. Aeroporti në qytet u bombardua,” tha Jamala.
Ajo shprehu gjithashtu mirënjohje për pritjen e ngrohtë dhe mirësinë ndaj njerëzve që erdhën nga Turqia në kufirin rumun për t’i pritur.
“Turqit na shpëtuan. Miqtë shumë të përzemërt të motrës sime erdhën nga Stambolli në kufirin rumun, na morën prej andej dhe na sollën në Stamboll së bashku me fëmijët,” tha ajo.
Ajo tha se gjyshja e saj, një tatare e Krimesë, si shumë tatarë të tjerë të Krimesë, duhej të largohej nga vendi i saj në vitin 1944, duke shtuar se kurrë nuk e kishte menduar se do t’i duhej të largohej nga vendi i saj pothuajse në të njëjtën mënyrë.
Ajo tha gjithashtu se lufta në vendlindjen e saj duhet të përfundojë menjëherë.
“Burri im ka qëndruar në Ukrainë, dhe unë kam ardhur këtu që zëri im të dëgjohet në mbarë botën, sepse kjo luftë duhet të marrë fund dhe të gjithë t’i thonë ‘Jo’ kësaj lufte”, tha kjo artiste e njohur.
Udhëheqësi kombëtar i popullit tatar të Krimesë dhe një anëtar i Parlamentit të Ukrainës, Mustafa Abdulcemil Kirimoglu, vuri në dukje se ai kishte parë sulmet ruse në Ukrainë në televizion.
Duke iu referuar negociatave ndërmjet delegacioneve ruse dhe ukrainase për arritjen e armëpushimit, Kirimoglu kujtoi se nuk u arrit asnjë rezultat pas raundit të parë të negociatave. Ai shtoi se tatarët e Krimesë duan që negociatat të vazhdojnë në Turqi.
Roman Nedilski, Konsulli i Përgjithshëm i Ukrainës në Stamboll, theksoi se ishte i lumtur që Yamala, së bashku me fëmijët, tani janë në një vend të sigurt.
Ai gjithashtu vuri në dukje se ukrainasit dhe tatarët e Krimesë kanë luftuar për lirinë e tyre për shekuj.
“Ne do ta arrijmë këtë vetëm së bashku. Tatarët e Krimesë dhe ukrainasit janë unikë dhe kanë vetëm një atdhe. Atdheu ynë është Ukraina,” tha ai.
Në fund, ai bëri thirrje që njerëzit të jenë me Ukrainën dhe qytetarët e saj.
“Ne po luftojmë kundër ushtrisë së dytë më të madhe në botë dhe ende po luftojmë. Ne nuk do të dorëzohemi. Ne do të qëndrojmë së bashku dhe do të fitojmë,” tha Nedilski. /tesheshi.com/
