Nënkryetari i Bashkisë së Tiranës, Arbian Mazniku, ka reaguar pas protestës së organizuar nga Partia Demokratike kundër ndërtimit të këndit të lojërave te parku i liqenit artificial, duke e cilësuar si vandale dhe që pengon zhvillimin e qytetit. Në një deklaratë për shtyp, nënkryetari i Bashkisë tha se protesta e demokratëve ishte një pseudoprotestë.
“Kjo sjellje nuk tregon as qytetari, as demokraci, as vlerë, është vandalizëm dhe prishje e qartë e çdo lloj logjike, ligji e funksionimi. Ata që protestuan sot janë disa njerëz, të cilët nuk e duan zhvillimin e qytetit”,- tha Mazniku.
Në vijim ai u shpreh se kjo është një pseudo-protestë, e cila ka vetëm një qëllim:
“Nuk duan zhvillimin e qytetit sepse është prova e qartë se qyteti mund të riparohet, qyteti mund të bëhet më i mirë dhe ata nuk e bënë dot. Nuk donin ta bënin se nuk kishin në zemër interesin e qytetit”, theksoi Mazniku.
Nënkryetari i Bashkisë së Tiranës përsëriti qëndrimin se projekti nuk parashikon asnjë objekt privat, por do të jetë vetëm për fëmijët. /tesheshi.com/
