“Bibël dhe Kuran është deklarata e pavarësisë së Kosovës”, kështu ka deklaruar së fundi residenti Thaçi, kur është pyetur nga gazetarët rreth mundësisë për ndarjen e Kosovës apo shkëmbimit të territoreve duke i quajtur të kota debatet e tilla. Por fraza ka qenë aq keq e artikuluar, sa nuk është kuptuar ndërfytja metaforike e librave të shenjtë në çështjen e pavarësisë, gjersa debati nuk është mbi të, është mbi territorin.
Thaçi, në konferencën me presidentin slloven, më tej tha se respektimi i integritetit territorial është shumë i qartë për Kosovën.
“Ne po shënojmë 10-vjetorin e pavarësisë me 115 njohje ndërkombëtare. Ky është sukses historik. Ne i dimë pengesat që i kemi pasur për anëtarësimin e Kosovës nëpër mekanizma ndërkombëtar. Kosova ka integritetin e paprekshëm i njohur dhe i pranuar ndërkombëtar. Janë shqetësuese debatet për gjëra të kota dhe për mua këto tema janë të vdekura. Ka pasur më herët ide për ndarje madje prej liderëve të Kosovës. Po flas për shkëmbim, mirëpo unë kam qenë i qartë gjithmonë. Respektimi integritetit territorial është i qartë për Kosovën. Ide të tilla nuk janë të institucioneve të Kosovës, por dua të them edhe lakimi i emrit tim nuk është i rastësishëm. Dhe unë i kuptojë këto sponzorizime”, deklaroi Thaçi.
Kujtojmë se debati është provokuar nga kryetari i komisionit parlamentar për Kosovën në Serbi, Milovan Dreçun, i cili drejtoi gishtin kah Thaçi duke thënë se “është duke u përpjekur që “nën tavolinë” të ofrojë bisedime për mundësinë e shkëmbimeve të territoreve mes Kosovës dhe Serbisë. /tesheshi.com/
