Kjo ka qenë pa diskutim java më e errët e Bajernit gjatë këtij sezoni të ri. Humbja e së mërkurës ndaj Atletikos së Madridit në Champions League është shoqëruar me një barazim në shtëpi ndaj Këlnit, në një ndeshje të vlefshme për javën e gjashtë të Bundesligës.
Seria e pesë fitoreve është ndërprerë sot për skuadrën e Ancelotti-t nga një Këln i mirëvendosur në fushë, me një prej mbrojtjeve më të mira në kampionatin gjerman, ku një meritë të jashtëzakonshme ka dhe Mërgim Mavraj.
Lojtari i kombëtares shqiptare është kthyer në një prej lojtarëve të pazëvendësueshëm të Këlnit. Me të në fushë, Këlni ka pësuar vetëm 3 gola, si skuadra e dytë me më pak gola të pësuar, pas Bajernit të Mynihut.
Takimi i luajtur në prani të 75.000 spektatorëve ka përfunduar 1-1. Kimmich e kaloi Bajernin në epërsi në minutën e 40-të, kurse Modeste i barazoi shifrat në minutën e 63-të. Të dy ekipet patën dhe raste të tjera, por nuk mundën ta ndryshojnë më rezultatin.
Bajerni do të vazhdojë ta mbajë vendin e parë në Bundesligë, me 16 pikë. Këlni mund të kënaqet tani për tani me vendin e katërt, me 4 pikë më pak se kryesuesit. /tesheshi.com/
