Komisioni Evropian rekomandoi heqjen e kontrolleve kufitare brenda zonës Shengen deri më 15 qershor, hapjen e kufijve të jashtëm për vendet e Evropës Juglindore nga 1 korriku, dhe gradualisht hapjen e kufijve të jashtëm për qytetarët e vendeve të tjera të treta, sipas situatës së tyre epidemiologjike.
“Komisioni rekomandon që anëtarët e zonës Shengen dhe vendet e lidhura me to të heqin kontrollet e brendshme të kufijve deri më 15 qershor 2020, të zgjasin kufizimet e përkohshme të udhëtimit në BE që nuk janë të domosdoshme deri më 30 qershor, dhe të përgatisin një kornizë për një hapje graduale pas kësaj,” tha Komisioneri i Çështjeve të Brendshme të BE, Ylva Johansson.
Komisioni gjithashtu rekomandon që kufizimet e udhëtimit në BE të hiqen për qytetarët e Shqipërisë, Bosnje-Hercegovinës, Kosovës, Malit të Zi, Maqedonisë Veriore dhe Serbisë nga 1 korriku, “pasi situata e tyre epidemiologjike është e ngjashme ose më e mirë sesa në BE.”
Për vendet e tjera të treta, KE nuk rekomandon heqjen e përgjithshme të kufizimeve, pasi situata shëndetësore në disa prej tyre është kritike.
Prandaj është propozuar që të hiqen kufizimet për grupin e zgjedhur të vendeve, dhe përzgjedhja duhet të bazohet në parime dhe kritere objektive, përfshirë statusin shëndetësor, aftësinë për të prezantuar masa për të luftuar infeksionin gjatë udhëtimit dhe reciprocitetin.
Menaxhimi i kufijve është përgjegjësia e vetme e Shteteve Anëtare dhe KE nuk mund të vendosë për këtë, por vetëm ta rekomandojë atë.
Për shtetasit e vendeve për të cilët mbeten kufizimet, KE rekomandon zgjerimin e kategorive të udhëtarëve që mund të hyjnë në BE, për shembull për studentët.
“Pas heqjes së kontrolleve të brendshme të kufijve, ne propozojmë një qasje të qartë dhe fleksibël për heqjen e kufizimeve të udhëtimit në BE nga 1 korriku. Udhëtimi ndërkombëtar është thelbësor për turizmin dhe biznesin, për lidhjen e familjes dhe miqve”, theksoi Johansson. /tesheshi.com/
