Komisioni Evropian ka propozuar që të gjithë autobusët e rinj të qytetit duhet të kenë zero emetim të gazrave serrë nga viti 2030 dhe një reduktim 90 për qind të emetimeve nga kamionët e rinj deri në vitin 2040.
Ky propozim duhet të kontribuojë në qëllimin e vendosur të Bashkimit Evropian që deri në vitin 2050, pothuajse të gjitha automjetet në rrugët evropiane do të jenë pa emetime të dioksidit të karbonit.
Kamionët, autobusët e qytetit dhe autobusët në distanca të gjata janë përgjegjës për më shumë se 6 për qind të emetimeve totale të gazeve serrë në BE dhe më shumë se 25 për qind të emetimeve të gazeve serrë nga transporti rrugor.
Standardet e reja, më të rrepta do të siguronin që ky segment i trafikut rrugor të kontribuojë në kalimin drejt lëvizshmërisë me emetim zero dhe synimeve të BE-së në fushën e klimës dhe ndotjes zero.
Komisioni propozon që gradualisht të futen standarde më të rrepta të emetimeve të dioksidit të karbonit për pothuajse të gjitha automjetet e reja të rënda në krahasim me nivelet e vitit 2019, me 45 për qind nga viti 2030, 65 për qind nga viti 2035 dhe 90 për qind nga viti 2040.
Paketa ligjore “Gati për 55”
Autobusët e rinj të qytetit duhet të kenë zero emetim të dioksidit të karbonit nga viti 2030.
Shumica dërrmuese e automjeteve të rënda në rrugët evropiane, 99 për qind, aktualisht punojnë me motorë me djegie të brendshme, kryesisht me lëndë djegëse fosile të importuara si dizel.
Kjo rrit varësinë energjetike të BE-së dhe paqëndrueshmërinë aktuale të tregut të energjisë.
Komisioni paraqiti propozimet e tij për autobusët dhe automjetet e rënda në të njëjtën ditë kur Parlamenti Evropian në Strasburg konfirmoi aplikimin e detyrueshëm të emetimeve zero për makinat dhe furgonët e rinj nga viti 2035, që do të thotë se në 12 vjet asnjë automjet i ri me benzinë dhe naftë nuk do të jetë në gjendje të te shitet.
Standardet e reja të emetimit të dioksidit të karbonit për makinat dhe furgonat, si dhe propozimi i ri i KE-së, janë pjesë e paketës ligjore “Gati për 55”. /tesheshi.com/
