Komisioni Evropian do të paraqesë “çertifikatat dixhitale të gjelbërta” javën tjetër, të cilat do të bëjnë të mundur uljen ose heqjen e disa prej kufizimeve ekzistuese të udhëtimit brenda Bashkimit Evropian, njoftoi Komisionerja për Punët e Brendshme Ylva Johansson.
Pas takimit me video të ministrave të brendshëm të BE-së, ajo shpjegoi se çertifikatat dixhitale do të shfaqin tre lloje informacioni që duhet të mundësojnë një fluks më të lirë të njerëzve brenda Shengenit.
“Me këto çertifikata, ju do të jeni në gjendje të tregoni se keni ose një test negativ PCR, ose se keni antitrupa, ose që jeni vaksinuar me një vaksinë të rekomanduar nga Agjencia Evropiane e Barnave (EMA)”, thotë Johansson.
Ajo theksoi se çertifikatat e tilla do të jenë një “mënyrë e mirë dhe efektive” për të treguar me celular se nuk jeni transportues ose se keni një rrezik të ulët të transmetimit të infeksionit gjatë udhëtimit.
Sapo KE të paraqesë propozimin e saj për çertifikatat dixhitale, ajo do të duhet të miratohet nga Këshilli i BE dhe Parlamenti Evropian në mënyrë që të hyjë në fuqi në BE.
Në Bruksel, ata theksojnë se do të koordinojnë ndërveprimin e këtyre certifikatave midis 27 vendeve të BE-së dhe se aplikimi i tyre mund të fillojë para pushimeve verore. /tesheshi.com/
