Instituti Demokratik i Kosovës bëri thirrje për ndaljen e praktikave të bllokimit të punës së Kuvendit, me anë të një deklarate në reagim të sulmit të sotëm me vezë ndaj kryeministrit Mustafa nga deputetë të opozitës dhe ndërprerjes së seancës.
“Mekanizmat institucionalë për të kundërshtuar çështjet të cilat trajtohen në Kuvend janë të përcaktuara në Kushtetutë, dhe asnjë formë tjetër e kundërshtimit nuk ndihmon në sqarimin dhe as zgjidhjen e problemeve,” thuhet në reagimin e KDI-së.
KDI shton se veprimet e deputetëve mund të transmetohen edhe te qytetarët, dhe kështu të shkaktohen incidente mes grupeve shoqërore, pasojat e të cilave mund të jenë të pariparueshme.
“Acarimi i situatës, dhe veprimet që shkojnë përtej debatit politik nuk janë zgjidhje”, thotë KDI.
Instituti Demokratik i Kosovës apeloi të gjithë aktorët politikë për vetëpërmbajtje dhe ushtrim të detyrave të tyre brenda mandatit që kanë, sepse çdo veprim i cili mund të gjenerojë një ambient politik të dhunshëm është i papranueshëm dhe i dënueshëm. /tesheshi.com/
