Korrupsioni vazhdon të lulëzojë në Kosovë, dhe vendi ka parë progres minimal në luftën kundër tij gjatë katër viteve të fundit. Kështu u tha sot në Institutin Demokratik të Kosovës (KDI), i cili ka publikuar raportin, “Vlerësimi i Sistemit të Integritetit Kombëtar në Kosovë”.
Bashkëpunimi i dobët institucional dhe mangësitë në zbatim të ligjit tregojnë që ka mungesë të vullnetit dhe të angazhimit politik në luftimin e korrupsionit, thekson raporti.
Visar Sutaj, një nga autorët e raportit, tha se në Kosovë ka një tendencë për t’i adresuar problemet e korrupsionit me strategjitë kombëtare dhe planet e veprimit që në praktikë duken më shumë si listë dëshirash, në vend të zgjidhjeve me prioritetet për ndryshim.
Libor Chlad, përfaqësues i Zyrës së BE-së në Kosovë, deklaroi se ka shumë institucione në Kosovë që e luftojnë korrupsionin. “Sfida kryesore është të bëhet një përpjekje e përbashkët për ta luftuar atë,” tha ai.
Drejtori ekzekutiv i KDI-së, Ismet Kryeziu, u shpreh se nëse qeveria vazhdon të mos i qaset me seriozitet trajtimit të korrupsionit, jo vetëm që vendi do të vuajë në drejtim të stabilitetit politik dhe financiar, por qytetarët e Kosovës do të vazhdojnë t’i ndiejnë efektet e varfërisë si pasojë e veprimeve dhe metodave korruptive të përhapura me tendenca alarmante.
“Prandaj unë me të vërtetë shpresoj se ky studim do ta ndihmojë qeverinë që të gjenerojë vullnetin e nevojshëm politik për marrjen e masave konkrete për parandalimin e korrupsionit,” deklaroi Kryeziu.
Për më tepër, studimi konstaton se ekziston një mungesë e bashkëpunimit në mes institucioneve dhe aktorëve të përfshirë në luftimin e korrupsionit, pavarësisht disa iniciativave të izoluara kundër tij. Integriteti dhe llogaridhënia institucionale janë në nivel shumë të ulët.
Në veçanti, hulumtimi konkludon se partitë politike, ndërmarrjet në pronësi shtetërore dhe qeveria janë sektorët me integritetin më të ulët sa i përket tolerancës ndaj korrupsionit. Kjo konfirmon supozimin se politika dhe qeveria, ku është përqendruar fuqia politike dhe financiare dhe nga ku ajo shpërndahet tek sektorët e tjerë, janë thelbi i problemit në mungesën e rezultateve në luftën kundër korrupsionit dhe në mungesën e përgjithshme të vullnetit politik për ta luftuar atë. /tesheshi.com/
