Instituti Demokratik i Kosovës (KDI) ka bërë të ditur sot raportin 6 mujor të qendrës “Alac”, i cili është në kuadër të programit transparenca dhe korrupsioni, me anë të së cilës qytetarët mund të raportojnë për raste të korrupsionit.
Sipas menaxherit të këtij programi, Artan Canhasi, gjatë kësaj kohe janë raportuar gjithsej 35 raste të korrupsionit apo sinjalizues për raste të mundshme të korrupsionit.
“Nga 35 rastet e raportuara për gjysmë e dytë të vitit, shtatë u takojnë shkeljeve të pretenduara nga ministritë, gjashtë nga komunat, pesë nga gjykatat dhe prokuroritë dhe katër nga AKP. Kurse sipas natyrës, mos zbatimi apo zvarritja e marrjes së vendimeve gjyqësore prin me 10 raste, pasuar nga nëntë raste të raportuara për kurdisje tenderësh. Shkelja e të drejtave të punës dhe nepotizmi gjatë punësimit gjithashtu janë raportuar nga qytetarët nga tre herë secila”, tha ai.
KDI thekson se analiza e statistikave shpërfaq problemet më të shpeshta, me të cilat përballen qytetarët, prandaj ka ofruar edhe një numër të rekomandimeve për të përmirësuar situatën.
“Duke parë trendin e vazhdueshëm të shpenzimit të buxhetit përmes “kuotimit”, si formë e prokurimit, rekomandohet që autoritetet kontraktuese, të publikojnë në uebfaqen e KRPP-së apo edhe uebfaqet e tyre shpalljet për këtë lloj aktiviteti.
Gjithashtu rekomandohet që të zvogëlohet shuma e lejuar e prokurimit përmes kuotimit nga 10,000 Euro në 5,000 Euro. Kurse lidhur me konfliktin e interesit gjatë punësimit, është vërejtur nevoja e pasurimit të dispozitave normative mbi parandalimin e konfliktit të interesit duke konkretizuar për rastet e funksionarëve të tillë”, thekson KDI./tesheshi.com/
