Përqafimi i paqes që Kavani bëri me Nejmar, pas shënimit të golit prej secilit, në ndeshjen e fituar 3-0 me Bajernin e Mynihut, nuk i ka prerë shpresat klubeve të tjera.
Pavarësisht se të dy lojtarët e PSG e dinin që kishin sytë e gjithë botës mbi shpinë, ata demonstruan publikisht se i kishin zhdukur mosmarrëveshjet. Por përqafimi ka dhënë efekt të kundërt: ka shtuar listën e skuadrave që dëshirojnë uruguajanin.
Mbase në janar jo, por në verë, secili prej klubeve do bëjë sulmin e vet për të marrë 31-vjeçarin. Çelsi është ndër skuadrat angleze që synon të “blindojë” sulmin me Kavanin. Por Arsenali ka muaj e muaj që e tenton “El Matador”, siç e tregoi në merkaton e verës së shkuar.
Për Kavanin ka vëmendje të shtuar edhe nga Juventusi, që e mban prej kohësh nën vëzhgim situatën e tij. Napoli është skuadra që po tenton ta rikthejë idhullin e tifozëve, në shtëpi, për të përforcuar sulmin, meqë synon të luajë në Champions League edhe sezonin tjetër.
E në fund, meqë ka dalë së fundmi “në skenë”, Kavani ka shumë vëmendje edhe në Gjermani, ku Borusia e Dordmundit e sheh si pasuesin e Aubamejang, i cili vitin tjetër, është “thuajse i ikur”.
I gjithë ky interesim në rritje, mori “krahë” pikërisht nga “grindja” Kavani – Nejmar, për gjuajtjen e penalltisë…Gjithnjë nëse nuk ka qenë gjithçka e stisur. /tesheshi.com/
