Ajo që mund të duket si një telekomedi politike, nuk është dhe aq. Eduart Ndocaj, i ashtëquajtori kaubojsi, ka deklaruar se do e shpallë kandidimin për kryetar të Partisë Socialiste në Kongresin e 19 marsit.
Ai ka shpërndarë një deklaratë ku thuhet se vendimin e ka marrë pas kërkesës që i është bërë nga mijëra socialistë të ndershëm brenda Shqipërisë dhe në diasporë.
“Ata, pasi dëgjuan ‘shashkën’ që u hodh në media, i kërkuan atij të vazhdojë seriozisht kandidimin dhe të jetë një përfaqësues i rëndësishëm i tyre në Kongres. Kandidimi i z. Ndocaj nuk është çështje personale, inati apo rivaliteti. Kandidimi i z. Ndocaj nuk vjen kundër Ramës, për inat të Ramës apo për inat të Blushit” thuhet në njoftimin drejtuar mediave nga përfaqsuesi i tij për komunikimin me publikun.
Po ashtu, në njoftim Ndocaj krahasohet dhe me Berluskonin në llojin e frymës që përfaqson në politikë.
Sipas Ndocajt, siç thuhet në deklaratë, ky është kongresi i fundit dhe mundësia e fundit për PS që të reformohet e nëse kjo nuk ndodh në këtë kongres, PS rrezikon të zhduket si forcë politike. /tesheshi.com/
