Ish-zëdhënësja e grupit antiislam PEGIDA, Kathrin Oertel, ka publikuar dje në llogarinë e saj në rrjetin social elektronik Facebook një material filmik ku u kërkon ndjesë muslimanëve dhe emigrantëve.
Ajo pranonte mes të tjerash përgjegjësinë e saj për fushatën e PEGIDA-s kundër Islamit dhe të huajve. Gjithashtu, Oertel vinte në pah se nuk ishte e ndershme të shiheshin si problem për Gjermaninë dhe Europën emigrantët dhe ata të cilët kishin aplikuar për azil politik.
“Dua t’u kërkoj ndjesë të gjithë muslimanëve dhe emigrantëve të cilët janë integruar në vendin tonë, që jetojnë paqësisht dhe tregojnë respekt për ligjet dhe kulturën tonë,” ishin ca prej fjalëve të ish-zëdhënëses.
“Sa për përgjegjësinë time, kërkoj ndjesë për të, dhe kam për të bërë gjithçka që gjërat të shkojnë siç duhet,” vijonte më tej Oertel.
Kathrin Oertel, një prej themeluesve të PEGIDA-s, e një figurë kryesore në organizimin e manifestimeve të lëvizjes, u tërhoq në janar.
Tërheqja e saj ngjau vetëm një javë pas dorëheqjes së themeluesit të grupit, Lutz Bachmann, mes zhurmës së krijuar për shkak të një fotografie të postuar prej tij po ashtu në Facebook, në të cilën shfaqej i veshur si Adolf Hitleri. /tesheshi.com/
