Shtrimi i luleve në një plazh në Bodrum, Turqi, shënoi përvjetorin e katërt të vdekjes së një 3-vjeçarit sirian Aylan Kurdi, trupi i pajetë i të cilit u gjet në brigjet turke të Mesdheut në fillim të shtatorit 2015.
Një anije me 14 refugjatë sirianë u fundos më 2 shtator 2015 në Detin Mesdhe në përpjekje për të arritur në ishujt grekë. Si pasojë, pesë njerëz u mbytën, duke përfshirë 3-vjeçarin Aylan, trupi i pajetë i të cilit u gjet në një plazh në Bodrum, ku më pas fotoja me trupin e tij përmbys bëri xhiron e botës dhe u bë një simbol i refugjatëve sirianë që vuanin në Evropë.
Përveç shumë qytetarëve, në përvjetorin e vdekjes së Aylanit të vogël morën pjesë regjisori dhe producenti i filmit kushtuar fatit të tij tragjik, Omer Sarikaya dhe Bahattin Ozturk.
Sarikaya, në një deklaratë për shtyp, kujtoi se skena me trupin e Aylan në plazh bëri që gjithë bota të qajë, duke shtuar se çdo njeri ndjehet pjesërisht fajtor për këtë ngjarje.
“Ky djalë është bërë një simbol i shqetësimit në mbarë botën, por për fat të keq asgjë domethënëse nuk ka ndryshuar që nga ajo ditë dhe kjo është arsyeja pse ne jemi të gjithë këtu sot”, tha ai. /tesheshi.com/
