Austria, Franca, Irlanda dhe Holanda i kanë bërë thirrje Bashkimit Evropian që të forcojë ligjet që synojnë të frenojnë ndikimin klimatik të udhëtimit me avion privat, sipas një dokumenti të përbashkët.
Në vendet e përmendura janë disa nga aeroportet më të ngarkuara në Evropë.
Mes tyre janë Schiphol i Amsterdamit dhe “Charles de Gaulle” në Paris.
Schiphol njoftoi në prill se do të ndalonte uljet dhe ngritjet e avionëve privatë dhe të biznesit të vogël, të cilët shkaktojnë 20 herë më shumë emetime të dioksidit të karbonit sesa fluturimet normale komerciale.
Paralelisht, Franca këtë javë ndaloi fluturimet e shkurtra tregtare të brendshme në rrugët ku ofrohen shërbime të mjaftueshme hekurudhore për pasagjerët.
Më shumë se 5.3 milion ton dioksid karboni
Në një dokument të ndarë me anëtarët e BE-së përpara një takimi të ministrave të tyre të transportit javën e ardhshme, të katër vendet thanë se besonin se gjurma “e tepruar” e karbonit për frymë e udhëtimit me avion privat duhet të nxisë veprimin e BE-së.
“Ne besojmë se, kur bëhet fjalë për këtë çështje, duhet t’i kushtohet më shumë vëmendje në nivel të BE-së, veçanërisht me ndihmën e vlerësimit të mundësisë së vendosjes së masave më të forta rregullatore për udhëtimet me avion privat. Qëllimi ynë është të garantojmë që të gjithë të kontribuojnë në pjesën e tyre të drejtë në përpjekjet e përgjithshme për të reduktuar emetimet e gazeve serrë”, thuhet në dokument.
Në vitin 2022, fluturimet me avionë privatë në Evropë u rritën me 64 për qind.
Në të njëjtën kohë, më shumë se 5.3 milion ton dioksid karboni u lëshuan, sipas hulumtimit të kompanisë konsulente holandeze CE Delft, e cila u porosit nga Greenpeace.
Kjo është vetëm një pjesë e 147 milionë tonëve dioksid karboni që u emetuan në vitin 2019 nga të gjitha fluturimet nga BE dhe Islanda, Lihtenshtajni, Norvegjia dhe Zvicra edhe para se pandemia COVID-19 të ndalonte përkohësisht këtë sektor, sipas informacionit të agjencive të BE-së për sigurinë e trafikut ajror.
Megjithatë, aktivistët e klimës janë ankuar prej kohësh për emetimet e larta të karbonit për person kur fluturojnë me avionë privatë.
Demonstruesit ndërprenë fluturimet në Gjenevë
Rreth njëqind protestues ndërprenë fluturimet në aeroportin e Gjenevës të martën, duke kërkuar një ndalim.
Ministrat e transportit të vendeve të BE-së do të takohen më 1 qershor për të diskutuar dokumentin e hartuar nga të katër vendet.
Linjat ajrore evropiane do të përballen me kosto më të larta në vitet e ardhshme kur bëhet fjalë për emetimet e dioksidit të karbonit, duke pasur parasysh reformën e tregut të karbonit në BE.
BE ka rënë dakord për objektivat detyruese për linjat ajrore që të përdorin karburant më të qëndrueshëm. /tesheshi.com/
