Pas Benfikës, PSG-së, Volfsburgut dhe Realit të Madridit, të kualifikuara javën e shkuar, në dy mbrëmjet në vazhdim, të së martës dhe të së mërkurës, do të mësohen dhe emrat e katër skuadrave të tjera çerekfinaliste në Champions League.
Këtë të martë nuk priten shumë të papritura. Mançester Siti pret Dinamon e Kievit në “Etihad Stadium”, pasi e ka mundur 1-3 në ndeshjen e parë të luajtur më 24 shkurt. E vlerësuar si ndeshja më e mirë e Mançester Sitit këtë sezon, e duke marrë parasysh dhe rezultatin, nuk parashikohen probleme për kualifikimin. Kjo do të ishte hera e parë që Man. Siti arrinte në çerekfinalet e Champions League-s.
Atletiko e Madridit dhe PSV Eindhoveni do të ndaheshin në barazim pa gola në Holandë. Edhe pse rezultati lë të hapur gjithçka, spanjollët janë një hap përpara, e cilësohen si pretendentë.
Dy takimet e së mërkurës sugjerojnë diçka tjetër, më luftarake, më të paparashikuar. Bajerni i Mynihut do të ketë për mysafir Juventusin. 2-2 ka përfunduar takimi në Torino, por kjo nuk do të thotë se Juventusi është dorëzuar. Ekspertë të lojës taktike, italianët janë të aftë gjithmonë t’i përmbysin rezultatet. Interesante do të jetë të shihet se cila shkollë do të triumfojë, ajo italiane apo ajo gjermane.
Në ballafaqimin në “Campo Nou”, Barcelona e pret Arsenalin me avantazhin e ndeshjes së parë, pasi e ka e fituar 0-2 takimin në Londër. Përndryshe, Arsenali nuk ka çfarë të humbasë, dhe vjen pas eliminimit në FA Cup. Situata e vështirë nuk do të thotë se anglezët nuk mund të surprizojnë, edhe pse duket pak e pamundur. /tesheshi.com/
