Nga Blendi Gashi
Në vend që gushti të jetë muaji i krijimit të institucioneve dhe ligjvënësit të nisin punën për t´u marrë me hallet e qytetarëve, ai ka dhënë një fotografi krejt tjetër.
Gushti i 2017-tës do mbahet mend si muaji i rrahjeve të njerëzve të shtetit, të afërmve të tyre e gazetarëve.
Rrahja e drejtorit të burgjeve, Sokol Zogaj (16 gusht), drejtorit të gazetës “Insajderi”, Parim Olluri (16 gusht), bashkëshortes së ministrit Blerand Stavileci, Vitore Stavileci (28 gusht) dhe së fundmi anëtarit të partisë NISMA në Skenderaj, Beqir Veliu (30 gusht), kanë trazuar jo pak vendin duke e futur në një qorroskak të madh.
Personat në fjalë u rrahën në prag të shtëpisë, pra dikush duke dalë e kush tjetër duke hyrë në banesë. Për më keq u goditën gra pa pikë faji, vetëm pse burrat e tyre shprehen lirshëm.
Edhe pse sulmet kanë ndodhur në kryeqytet dhe vende të frekuentuara sulmuesit e tyre fatkeqësisht ende nuk janë identifikuar, dhe liria atyre u lë mundësi të planifikojnë ndonjë sulm fizik tjetër.
Gjithçka që deklarohet nga policia edhe pas më shumë se dhjetë ditësh nga sulmet, është se “hetimet po vazhdojnë” duke mos dhënë asnjë informatë tjetër.
Ky dështim i institucioneve të drejtësisë është një sinjal tejet i keq për sigurinë e qytetarëve qofshin ata politikan apo jo, pasi tregon se një grup prej dy-tre personash me çorape në kokë lirisht mund të rrahin në pikë të ditës kë të duan, ndërsa në mbrëmje mund të festojnë dhe pse jo të marrin paratë e premtuara nga urdhërdhënësit e tyre.
“Vajtimi” i krerëve të shtetit
Ndaj sulmeve në fjalë u çuan në këmbë drejtues të institucioneve vendore e ndërkombëtare, përfaqësues të shoqërisë civile e jo vetëm duke kërkuar nga drejtësia që të bëj punën e saj dhe t’i kap menjëherë njerëzit me maska.
Duke filluar nga presidenti, kryeministri, kryekuvendari, minsitrat në detyrë, përfaqësues të partive politike e të shoqërisë civile por jo vetëm, shkruajtën në profilet e tyre në Facebook statuse nga më të ndryshme duke u shtyrë me njëri-tjetrin se cili po i bën më të ashpër ndaj akteve në fjalë por edhe njëherit duke treguar dashurinë për shtetin se kinse “askush nuk mund ta dëmtojë” dhe se “huliganët” në fjalë do të marrin dënimin e merituar.
Po këta politikanë që në listat e tyre zgjedhore qoftë për kryetarë komunash, deputetë e asambleistë komune nuk fusin as 5 % gra, shprehin dhembjen e madhe për sulmet fizike ndaj grave këtë rast Vitore Stavilecit guras së ministrit Stavileci.
Krerët instiucionalë duhet ta kenë të qartë se as Vitorja por as edhe e fejuara e gazetarit Olluri nuk kanë nevojë aq për ngushëllimet e tyre sa që personat që i sulmuan prapa shpine të vihen para drejtësisë dhe të marrin dënimin e merituar.
Dhe ndërsa drejtësia vazhdon të flerë, pra nuk kap agresorët, të dhunuarit sigurisht nuk do jenë të qetë ashtu si edhe qytetarët tjerë që mund të jenë objekt i sulmeve të mundshme. /tesheshi.com/
