Nga Blendi Gashi
Larg familjeve dhe farefisit ish-punëtorët e Fabrikës së Tubave të Ferizajt, do ta presin edhe këtë vit Kurban Bajramin.
Në një tendë pranë objektit të Qeverisë ata pa sofër, pa urime, do ta presin festën e Bajramit.
Ndihen të zhgënjyer se si në tri festat e shkuara të Bajramit asnjëherë nuk i vizitoi myftiu i Kosovës Naim Tërnava.
Të zhgënjyer janë edhe me përfaqësuesit e institucioneve që për një vit e 120 ditë i kanë lënë në tendë, derisa shëndeti i tyre vazhdon të jetë i përkeqësuar.
Ahmet Sylejmani, anëtar i këshillit grevistë ka thënë për portalin “Te Sheshi”, se punëtorët e Fabrikës së Tubave edhe këtë vit festën e Bajramit do ta presin pa sofër dhe pa urime, larg familjarëve të tyre.
“Kjo është festa e katërt e Bajramit në tendë. Edhe këtë vit ne do të jemi larg familjeve dhe më të dashurve tone. Është shumë e vështirë me qenë larg familjes, pikërisht në festën e Kurban Bajramit. Është traditë që të jemi afër familjes për Bajram duke përcjellur urimet njëri tjetrit. Por, për të katërtën herë kjo gjë po na mohohet. Institucionet e vendit po i shkelin vendimet e tyre, duke na lenë të festojmë larg familjes për diçka që është ligjore”.
“Poashtu është vërtetë pikëlluese se si asnjëherë nuk na vizitoi as myftiu Naim Tërnava, të pakëtn për festën e Bajramit, pasi ne i takojmë fesë muslimane. Ai është dashur të na vizitoi dhe të bëj përpjekje që së bashku të na mundëson edhe një takim me kryeministri Isa Mustafa.
E gjitha çfarë ka bërë BIK është dhënia e një iftari gjatë kohës së Ramazanit” ka thënë ai.
Sylejmani ka treguar se edhe këtë Bajram, grevistët do të shkojnë të falin namazin, derisa ka thënë se janë familjarët e tyre që i vizitojnë në festa në mënyrë që sadopak t’ua largojnë mallin për familjarët.
“Familja ime por edhe familjet e shokëve tjerë vijnë për festën e Bajramit të na vizitojnë. Gëzohemi shumë kur vijnë por në të njëjtën kohë nuk e kemi aq lehtë kur i shohim edhe ata të vijnë në tendë, për të në uruar festën. Institucionet e vendit janë fajtore që me vendimet e tyre po na pamundësojnë të mos jemi pranë familjarëve. Për të katërtin festë të Bajramit po na pamundësohet të jemi në shtëpi dhe të dalim të urojmë me vëllezërit dhe miqtë tone. Kjo vërtetë është e dhembshme, por nuk kemi çfarë të bëjmë.
Ne jemi do të vazhdojmë të qëndrojmë në tendën para Qeverisë dhe kuptohet që pa u realizuar kërkesat tona nuk do të largohemi. Mesazhi jonë është që institucionet qendrore t’i kryejnë obligimet ndaj nesh”, ka thënë Sylejmani.
Remzi Murati, grevist ka deklaruar për ‘Te Sheshi’, se ndihet i mërzitur që edhe këtë vit për festën e Bajramit do të jetë larg familjarëve të tij.
“Ndihem keq që nuk kam mundësi me qenë afër familjarëve për festën e madhe të Kurban Bajramit. Tradicionalisht këtë fest e kam pritur dhe festuar së bashku me familjen dhe miqtë, por për të katërtën here do ta pres larg tyre. Shpresoj që sa më pare të na plotësohen kërkesat dhe të largohemi nga kjo tendë, të shkojmë në shtëpitë tona”, ka thënë Murati.
Ish punëtorët e Fabrikës së tubave kanë thënë për portalin tonë se të vendosur do të qëndrojnë në tendë deri në realizimin e kërkesave të tyre që është shlyerja e borxhit mbi 25 milionë euro, si paga të papaguara për dhjetë vjet për 912 punëtorët të kësaj fabrike. /tesheshi.com/
