Katari do të presë bisedimet indirekte midis Iranit dhe Shteteve të Bashkuara në ditët në vijim, njoftuan mediat iraniane të hënën, në mes të përpjekjeve të Bashkimit Evropian për të thyer një ngërç prej muajsh në negociatat për të rivendosur marrëveshjen bërthamore të vitit 2015.
“Irani ka zgjedhur Katarin për të pritur bisedimet për shkak të marrëdhënieve miqësore midis Dohas dhe Teheranit,” tha për agjencinë e lajmeve ISNA të hënën, Mohammad Marandi, një këshilltar për media i kreut të ekipit negociator bërthamor të Iranit.
Në mars, marrëveshja dukej afër përfundimit kur BE-ja, e cila koordinon bisedimet, u bëri thirrje ministrave të jashtëm që përfaqësonin palët në Vjenë që të finalizonin marrëveshjen pas 11 muajsh bisedimesh indirekte midis Teheranit dhe administratës së presidentit amerikan Joe Biden.
Bisedimet që atëherë janë pezulluar, megjithatë, kryesisht për shkak të këmbënguljes së Teheranit që Uashingtoni të heqë Gardën Revolucionare të Republikës Islamike, një forcë elitare të armatosur, nga lista e SHBA-së e organizatave të huaja terroriste.
Vazhdimi i negociatave indirekte
Ministri i Jashtëm evropian Josep Borrell, i cili ishte në Iran javën e kaluar, tha të shtunën se bisedimet indirekte priten të vazhdojnë në ditët në vijim në vendin e Gjirit për të kapërcyer bllokadën.
Ndërsa një burim amerikan tha se i dërguari i posaçëm i SHBA për Iranin, Robert Malley pritet të mbërrijë në Doha të hënën, një zyrtar iranian i tha Reuters se shefi i ekipit negociator bërthamor iranian Ali Bagheri Kani do të jetë në Doha për bisedime më 28 dhe 29 qershor.
Javën e kaluar, një zyrtar iranian dhe evropian i thanë Reuters se Irani kishte hequr dorë nga një kërkesë për të hequr Gardën Revolucionare nga lista e terroristëve, por se dy çështje të tjera, përfshirë sanksionet e SHBA-së, duheshin zgjidhur.
“Asgjë nuk është rënë dakord derisa të jetë rënë dakord për gjithçka. Ne do të shohim nëse një marrëveshje mund të arrihet në javët e ardhshme, masat bërthamore të Iranit janë të kthyeshme nëse Uashingtoni përmbush detyrimet e tij”, tha të hënën zëdhënësi i Ministrisë së Jashtme iraniane Saeed Khatibzadeh. /tesheshi.com/
