Dita kombëtare e Katarit kremtohet më 18 dhjetor, por të gjitha veprimtaritë festive janë anuluar në shenjë solidariteti me vuajtjet e sirianëve në Halep.
Parada në mëngjes, vargu i veprimtarive kulturore, si dhe fishekzjarret nuk kanë qenë pjesë e festimeve të ditës kombëtare të Katarit.
Vendimin për anulimin e festimeve e shpalli ditë më parë emiri i Katarit, Shejh Temim bin Hamad El Thani.
“Në solidaritet me popullin tonë në qytetin e Halepit, me ata që i janë nënshtruar llojit më të keq të shtypjes dhe torturës, zhvendosjes dhe gjenocidit, Lartësia e Tij, Shejh Temim bin Hamad El Thani, emiri i Katarit, ka urdhëruar anulimin e të gjitha festimeve dhe veprimtarive të ditës kombëtare,” thuhej në njoftimin përkatës.
Ministri i Jashtëm i Katarit do ta akuzonte gjithashtu qeverinë siriane për kryerje të krimeve kundër njerëzimit.
Një veprim i ngjashëm qe ndërmarrë nga Katari dy vite më parë, në 2014-n, kur festimet për Bajramin u anuluan në shenjë solidariteti me popullin e Gazës. /tesheshi.com/
