Katari është duke biseduar e Iranin dhe Shtetet e Bashkuara të Amerikës për deeskalimin e situatës, ka bërë me dije ministri i Jashtëm i Katarit, Muhamed bin Abdulrahman Al Thani. Gjatë një vizite që Al Thani e ka bërë në Londër, ai ka kërkuar që të dyja palët që të takohen dhe të gjejnë një kompromis.
“Ne besojmë se në një moment duhet gjetur një rrugë – kjo situatë nuk mund të zgjasë përgjithmonë”, tha ai.
“Meqenëse palët janë deklaruar se nuk janë gati të angazhohen me vepra, ato duhet të dalin me ide që hapin dyert për përmirësim”.
Al Thani gjithashtu tha se ka pasur një shkëputje midis palestinezëve dhe Shteteve të Bashkuara mbi planin amerikan që synon përfundimin e konfliktit midis Izraelit dhe palestinezëve. Ai ka paralajmëruar se nuk mund t’u imponohej palestinezëve zgjidhja e tyre e gatshme.
Plani amerikan, i drejtuar nga Jared Kushner, shihet nga palestinezët si një plan për t’i dhënë fund kauzës palestineze.
Uashingtoni ka kërkuar të mbajë fort marrëdhëniet me Katarin, një shtet i pasur me naftë dhe gaz, i cili ka mbajtur marrëdhënie të ngrohta me Teheranin, ashtu si me vendet e tjera arabe të Gjirit të udhëhequr nga Arabia Saudite.
Por për dy vjet, Arabia Saudite dhe aleatët e saj, Emiratet e Bashkuara Arabe, Bahreini dhe Egjipti, kanë ndaluar fluturimet e Katarit nga aeroportet e tyre ku bllokuan hapësirën ajrore, ndaluan shumicën e vizitorëve të Katarit, shkurtuan lidhjet tregtare dhe mbyllën portet detare. E gjithë kjo erdhi pasi palët ishin “të pakënaqura” me këmbënguljen e Dohas për qasje më të hapur rajonale. /tesheshi.com/
