Katari ka vendosur të pezullojë përpjekjet e tij ndërmjetësuese midis Hamasit dhe Izraelit, thanë zyrtarët të shtunën.
Megjithatë, Katari ka shumë të ngjarë të kthehet në përpjekje nëse të dyja palët tregojnë “vullnet serioz politik” për të arritur një marrëveshje për luftën në Gaza, sipas një zyrtari në Egjipt, një tjetër ndërmjetës kyç.
Një burim diplomatik i njohur me këtë çështje tha se Izraeli dhe Hamasi, së bashku me Shtetet e Bashkuara, u informuan pas marrjes së vendimit. Burimi shtoi se “si pasojë, zyra politike e Hamasit nuk po i shërben më qëllimit të saj” në Katar.
Një zyrtar i lartë i Hamasit tha se ata ishin në dijeni të vendimit të Katarit për të pezulluar ndërmjetësimin, “por askush nuk na tha të largoheshim”.
Në Uashington, një zyrtar amerikan tha se administrata Biden e informoi Katarin dy javë më parë se vazhdimi i funksionimit të zyrës së Hamasit në Doha nuk ishte më i dobishëm dhe se delegacioni i Hamasit duhet të dëbohej.
Frustrimi në rritje
“Pas refuzimit të propozimeve të përsëritura për lirimin e pengjeve, udhëheqësit (Hamasit) nuk duhet të jenë më të mirëpritur në kryeqytetet e asnjë partneri të SHBA-së. Këtë ia bëmë të qartë Katarit pasi Hamasi hodhi poshtë një tjetër propozim për lirimin e pengjeve disa javë më parë”, tha një zyrtar i lartë i administratës amerikane.
Zyrtarët folën në kushte anonimiteti për shkak të ndjeshmërisë së çështjes. Zyra e kryeministrit izraelit nuk ka komentuar.
Njoftimi i Katarit vjen pas zhgënjimit në rritje për mungesën e përparimit në një marrëveshje armëpushimi.
Ende nuk i duket fundi luftës së Izraelit me Hamasin në Gaza dhe luftës së Izraelit me Hezbollahun në Liban, ku ushtria izraelite thotë se shkatërroi qendrat e komandës dhe infrastrukturën tjetër në periferitë jugore të Bejrutit brenda natës.
Të paktën 16 persona, përfshirë gra dhe fëmijë, u vranë në tre sulme të veçanta izraelite në Gaza të shtunën, thanë zyrtarët mjekësorë palestinezë, ndërsa Izraeli njoftoi dërgimin e parë të ndihmave humanitare në disa javë në veriun e uritur dhe të shkatërruar të Rripit. /tesheshi.com/
