Në fund të skadimit të afatit 10-ditor të 13 kërkesave ultimative të Arabisë Saudite drejtuar Katarit, në krizën më të fundit të Gjirit, Doha zyrtare i ka hedhur poshtë kategorikisht ato. Diçka të tillë ajo e kishte paralajmëruar sapo i morri ato, por që tha që gjithsesi do i shqyrtonte.
Ministri i Jashtëm i Katarit, Sheikh Mohammed bin Abdulrahman Al Thani, tha gjatë një konference për shtyp në Romë se “Doha nuk do të përmbushë asnjë nga 13 kërkesat e bëra nga Arabia Saudite dhe aleatët e saj”, por që nga ana tjeër ofronte “gadishmëri për dialog” në funksion të zgjidhjes së krizës.
“Të gjithë janë të vetëdijshëm se këto kërkesa kanë për qëllim të shkelin sovranitetin e shtetit të Katarit”, tha Al Thani.
“Ne besojmë se bota nuk qeveriset nga ultimatume; ne besojmë se bota qeveriset nga e drejta ndërkombëtare; ajo qeveriset nga një rregull që nuk lejon vendet e mëdha të detyrojnë vendet e vogla”, shtoi më tej zyrtari i lartë i Dohas.
Tashmë pritet reagimi saudit ndaj refuzimit të 13 kërkësave, si kusht për heqjen e embargos. Kriza nisi kur 5 shtete arabe me në krye Saudinë, vendosën të ndërpresin marrëdhëniet diplomatike me Katarin, me një zërë pretendimesh të sferës politike. /tesheshi.com/
