Irani ka arritur disa marrëveshje me Katarin dhe tani po punon në planet për të mirëpritur tifozët nga Kupa e Botës që do të mbahet në shtetin fqinj të Gjirit më vonë këtë vit.
Ministri i Transportit i Katarit, Yassim bin Saif al-Sulaiti foli me ministrin iranian të transportit Rostam Ghasemi gjatë një vizite dy-ditore në vendpushimin e ishullit Kish, që kulmoi me nënshkrimin e një marrëveshjeje të hënën, duke përfshirë lidhjen e zonave të informacionit të fluturimit të Dohas dhe Teheranit.
Të dy vendet kanë rënë dakord gjithashtu për të rritur fluturimet mes tyre, raportojnë mediat shtetërore.
Rritja e bashkëpunimit synon rritjen e numrit të tifozëve në ishullin Kish, i cili është 40 minuta me aeroplan dhe gjashtë orë me anije, larg nga Doha, si dhe rritjen e numrit të lundrimeve dhe fluturimeve në mënyrë që tifozët të kenë transport të përhershëm.
Al-Sulaiti u takua gjithashtu me Saeed Mohammad, kreun e Organizatës Industriale dhe Tregtisë së Lirë të Iranit.
Bashkëpunimi gjatë Kupës së Botës ishte objekt i një prej 14 marrëveshjeve të nënshkruara nga Presidenti iranian Ebrahim Raisi dhe Emiri i Katarit Tamim bin Hamad Al Thani në fund të shkurtit në Doha.
Megjithëse Kish-i ka qenë në qendër të vëmendjes, autoritetet iraniane shpresojnë të presin tifozët në ishuj të tjerë, si dhe në qytete në provincën jugore të Hormozganit. Ata gjithashtu duan t’i zgjerojnë këto masa përtej Kupës së Botës, e cila fillon në nëntor, për të rritur turizmin dhe lidhjet e transportit të të dy vendeve.
Ghasemi thotë se pret që qindra mijëra tifozë të qëndrojnë në Iran.
“Ne planifikojmë të krijojmë një mundësi për tifozët dhe turistët e huaj që duan të udhëtojnë në Iran gjatë pushimeve për të vizituar pamjet e vendit tonë”, tha ministri iranian.
Qëndrimi në Iran do të jetë shumë më i lirë për vizitorët e huaj sesa kapaciteti në Katar, pjesërisht për shkak të dobësimit të rialit iranian prej sanksioneve të vendosura nga SHBA ndaj këtij vendi në vitet e fundit.
Autoritetet iraniane shpresojnë që tifozët, të cilët do të qëndrojnë në Kishi dhe do të udhëtojnë gjatë Kupës së Botës, mund të përfitojnë nga sektori i turizmit, i cili po goditet rëndë nga COVID dhe sanksionet. /tesheshi.com/
