Edhe pok ditë dhe në Katar nis Botërori i futbollit, hera e parë në një vend arab, në Lindjen e Mesme, hera e parë në këtë kohë – vjeshtë/dimër.
Kupa e Botës është gjithashtu një mundësi për t’u njohur me këtë vend, i cili me të drejtë quhet perla e Gjirit.
Katari njihet si shteti më i pasur, por edhe një nga vendet më të sigurta në botë. Është e pasur me naftë dhe gaz, prandaj emisarë nga e gjithë bota, veçanërisht nga Bashkimi Evropian, po mbërrijnë në Doha këto ditë, nga frika e një krize energjitike që mund të vështirësojë dimrin në Evropë.
Emiri dha tokë për kishat
Por suksesi i Katarit nuk është vetëm rezultat i pasurisë së tij me lëndë djegëse fosile. Gjatë dekadave të fundit, janë zbatuar reforma të gjera në fushën e arsimit, të drejtave të punës, shëndetësisë, infrastrukturës. Në 30 vitet e fundit janë hapur shumë institute, galeri arti, fondacione dhe qendra kërkimore, të cilat shërbejnë edhe për ndërtimin e dialogut civil dhe kulturor në vend.
Diskutimet mbi çështjet e politikës së jashtme dhe të brendshme mbahen rregullisht në qendrat e ekselencës. Familja në pushtet ka vite që promovon politikën e dialogut ndërfetar.
Fjala vjen, në Doha ndodhet kisha e parë katolike e ndërtuar në tokën arabe pas 1400 vjetësh, që nga shekulli i VII. Bëhet fjalë për kishën e Zojës Rruzare. Aty u investuan 20 milionë dollarë dhe toka u dhurua personalisht nga reformatori emir i Katarit, Hamad bin Khalifa Al Thani, babai i emirit të sotëm, njëherazi sundimtari jashtëzakonisht i avancuar dhe modern i shtetit të Katarit, Tamim bin Hamad Al Thani.
Kisha u shenjtërua më 14 mars 2008 nga Kardinali Ivan Dias, Prefekt i Kongregatës për Ungjillëzimin.
Që nga viti 2002, marrëdhëniet me Vatikanin
“Nuk ka nevojë të shqetësoheni për gjetjen e një vendi të shenjtë për t’u lutur këtu në Katar”, sipas një faqe interneti që ofron informacion për besimtarët e krishterë së bashku me një listë të kishave.
Përveç kishës katolike, ka kisha për ortodoksë, përfaqësues të kishës anglikane, anëtarë të kishës Siro-Malabar, e cila është pjesë e komunitetit të krishterë të Shën Tomës në Indi, si dhe Baptistë, Mormonë e të tjerë. Kisha Katolike në Doha është pjesë e Vikariatit Apostolik të Arabisë Veriore dhe u shërben rreth 200,000 katolikëve në Katar, shumica e të cilëve janë punëtorë migrantë nga Filipinet, India, Amerika e Jugut, Afrika, Libani dhe Evropa. Katari, i cili është një vend me shumicë muslimane, vendosi marrëdhënie me Vatikanin në vitin 2002 dhe këtë vit do të shënojë 20-vjetorin e atij akti të rëndësishëm të dialogut, të cilit Doha i drejtohet fuqishëm.
“Eselaamu Alejkum, paqja qoftë me ju”, tha Papa Françesku teksa shkeli në tokën e Gadishullit Arabik.
“Paqja qoftë me ju”, u thotë Katari të gjitha kombeve të botës që do të mblidhen këtë dimër nga 20 nëntori deri në finalen e madhe, e cila do të luhet më 18 dhjetor, Ditën Kombëtare të Shtetit të Katarit. /tesheshi.com/
